मुंबई : राज्यातील राज्यसभेच्या दोन जागांसाठी निवडणूक प्रक्रिया सुरू असून, भारतीय जनता पक्षाने धैर्यशील पाटील यांना उमेदवारी देण्यात आली आहे. राष्ट्रवादी काँग्रेस पक्षानेही नितीन पाटील यांचा उमेदवारी अर्ज दाखल केला होता. उमेदवारी अर्ज दाखल करण्याचा अखेरचा दिवस संपल्यानंतर चार उमेदवारांनी दोन जागांसाठी अर्ज दाखल केले होते, त्यात दोन अपक्ष उमेदवारांचा समावेश होता. तथापि, अपक्ष उमेदवारांचे अर्ज योग्यतेच्या निकषांवर चुकते असल्याने ते बाद ठरवण्यात आले. त्यामुळे भाजप आणि राष्ट्रवादी काँग्रेस पक्षाचे उमेदवार बिनविरोध निवडले गेले आहेत.
धैर्यशील पाटील हे रायगड जिल्ह्यातील असून, भारतीय जनता पक्षाचे जिल्हाध्यक्ष आहेत आणि माजी आमदार आहेत. त्यांना राज्यसभेच्या माध्यमातून खासदारकी मिळाली आहे. याआधी त्यांनी रायगड-रत्नागिरी लोकसभा मतदारसंघातून निवडणूक लढवण्याची तयारी केली होती, पण तिकिट न मिळाल्याने त्यांनी युतीच्या उमेदवाराचा प्रचार केला होता. आता भारतीय जनता पक्षाने त्यांना राज्यसभेची उमेदवारी दिली आहे.
नितीन पाटील हे वाई महाबळेश्वरचे आमदार मकरंद पाटील यांचे बंधू आहेत आणि सध्या सातारा मध्यवर्ती बँकेचे अध्यक्ष आहेत. त्यांच्या वडिलांनाही खासदारपद लाभले होते. राष्ट्रवादी काँग्रेसने सातारा लोकसभा मतदारसंघ भारतीय जनता पक्षाला सोडला होता, त्यावेळी अजित पवारांनी नितीन पाटील यांना खासदार करण्याचे वचन दिले होते. त्या वचनानुसार, नितीन पाटील यांना राज्यसभेच्या उमेदवारीतून खासदारपद मिळाले आहे. सोमवार, २६ ऑगस्ट रोजी या दोन्ही उमेदवारांना प्रमाणपत्र देण्यात येणार आहे.
