पंजाबमध्ये मंगळवारी (5 मे 2026) रोजी रात्री एकापाठोपाठ एक झालेल्या दोन वेगवेगळ्या स्फोटांनी संपूर्ण राज्य हादरले असून सुरक्षा यंत्रणांना सतर्कतेचा इशारा देण्यात आला आहे. पहिली घटना जालंधर येथील सीमा सुरक्षा दलाच्या (BSF) मुख्यालयाबाहेर घडली, तर त्याच्या काही तासांनंतर अमृतसरच्या खासा परिसरातील लष्करी तळाजवळ (आर्मी कॅम्प) भीषण स्फोट झाल्याची माहिती समोर आली आहे. या दोन्ही घटनांमुळे संवेदनशील सीमावर्ती भागात खळबळ उडाली असून लष्करी आणि पोलीस प्रशासनाकडून तपास वेगाने सुरू करण्यात आला आहे.
BSF मुख्यालयाबाहेर स्कूटीचा भडका
पहिली घटना रात्री सुमारेआठ वाजून 15 मिनिटांनी जालंधरमध्ये घडली. बीएसएफ पंजाब मुख्यालयाच्या गेटबाहेर उभी असलेल्या एका स्कूटीमध्ये अचानक मोठा स्फोट झाला. या स्फोटामुळे परिसरात एकच धावपळ आणि भीतीचे वातावरण निर्माण झाले. सुदैवाने, या घटनेत आतापर्यंत कोणतीही जीवितहानी झाल्याचे वृत्त नाही. जालंधरच्या पोलीस आयुक्त धनप्रीत कौर यांनी दिलेल्या माहितीनुसार, गस्ती पथक जवळ असतानाच गेटजवळ उभ्या असलेल्या एका दुचाकीने अचानक पेट घेतला. प्राथमिक माहितीनुसार, ही स्कूटी एका कर्मचाऱ्याची असून सर्व पैलूंनी या घटनेचा तपास केला जात आहे.
अमृतसरमधील स्फोटाची तीव्रता
जालंधरच्या घटनेला काही तास उलटत नाहीत तोच, रात्री साडे दहाच्या सुमारास अमृतसरमधील खासा परिसरात लष्करी तळाजवळ दुसरा मोठा स्फोट झाला. स्थानिक नागरिकांच्या म्हणण्यानुसार, हा स्फोट इतका भीषण होता की त्याचा आवाज दीड किलोमीटर अंतरापर्यंत ऐकू आला. या धमाक्याच्या तीव्रतेमुळे आर्मी कॅम्पमधील भिंतींनाही हादरे बसले. या दोन्ही घटना एकाच रात्री आणि लष्करी आस्थापनांजवळ घडल्याने सुरक्षा यंत्रणांच्या भुवया उंचावल्या आहेत.
तपास यंत्रणांकडून पुरावे गोळा करण्याचे काम सुरू
या दोन्ही घटनांची माहिती मिळताच लष्करी अधिकारी आणि पंजाब पोलीस तातडीने सक्रिय झाले. घटनास्थळी फॉरेन्सिक टीमला पाचारण करण्यात आले असून तेथील माती आणि ढिगाऱ्याचे नमुने गोळा करण्यात आले आहेत. या स्फोटांमागे एखादे मोठे षडयंत्र आहे का? किंवा हे स्फोट नेमके कोणत्या प्रकारचे होते, याचा शोध आता घेतला जात आहे. खबरदारीचा उपाय म्हणून दोन्ही परिसरांना छावणीचे स्वरूप आले असून येण्या-जाणाऱ्यांची कडक तपासणी केली जात आहे.
हाय अलर्ट आणि कडक बंदोबस्त
सध्या या दोन्ही घटनांमध्ये कोणत्याही मोठ्या नुकसानाची किंवा जीवितहानीची पुष्टी झालेली नाही. मात्र, या घटनांचे गांभीर्य लक्षात घेता संपूर्ण पंजाबमध्ये सुरक्षा व्यवस्था अधिक कडक करण्यात आली आहे. दोन्ही स्फोटांमध्ये काही साम्य आहे का किंवा त्यांचा एकमेकांशी काही संबंध आहे का, या दिशेने सुरक्षा यंत्रणा तपास करत आहेत. सीमावर्ती भागात संशयास्पद हालचालींवर लक्ष ठेवण्यासाठी गस्त वाढवण्यात आली आहे, जेणेकरून कोणताही संभाव्य धोका वेळीच थोपवता येईल.
पंजाबमधील या घटनांमुळे सीमा सुरक्षा दल आणि लष्करी छावण्यांची सुरक्षा पुन्हा एकदा ऐरणीवर आली आहे. अधिकाऱ्यांनी नागरिकांना अफवांवर विश्वास न ठेवण्याचे आवाहन केले असून संशयास्पद वस्तू दिसल्यास तत्काळ पोलिसांशी संपर्क साधण्यास सांगितले आहे. सध्यातरी परिस्थिती नियंत्रणात असल्याचे प्रशासनाकडून सांगण्यात येत असले, तरी संपूर्ण राज्यात एक प्रकारचे दहशतीचे आणि सावधगिरीचे वातावरण पाहायला मिळत आहे.
