ठाणे: महाराष्ट्र नवनिर्माण सेनेचे (मनसे) फायरब्रँड नेते आणि माजी प्रवक्ते प्रकाश महाजन यांनी अखेर आपल्या राजकीय प्रवासाची नवीन वाट निवडली आहे. गेल्या तीन महिन्यांपासून त्यांच्या पुढील वाटचालीबाबत सुरू असलेल्या चर्चांना पूर्णविराम मिळाला असून, महाजन यांनी उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याचा ऐतिहासिक निर्णय घेतला आहे. आज, 26 डिसेंबर रोजी दुपारी साडेबारा वाजता ठाण्यात शिंदे यांच्या उपस्थितीत हा पक्षप्रवेश सोहळा संपन्न होणार असून, यामुळे राज्याच्या राजकारणात मोठी खळबळ माजली आहे.
प्रकाश महाजन यांनी 13 सप्टेंबर रोजी मनसेच्या सर्व पदांचा तडकाफडकी राजीनामा दिला होता. महापालिका आणि स्थानिक स्वराज्य संस्थांच्या निवडणुका तोंडावर असताना महाजन यांनी घेतलेली ही एक्झिट मनसेसाठी मोठा धक्का मानली जात होती.
राजीनामा दिल्यानंतर त्यांनी काही काळ ‘वेट अँड वॉच’ची भूमिका घेतली होती. मात्र, काल रात्री त्यांनी उपमुख्यमंत्री एकनाथ शिंदे यांची भेट घेऊन त्यांच्यासोबत काम करण्याची इच्छा व्यक्त केली. एकनाथ शिंदे यांनीही त्यांचे स्वागत केले असून, आता महाजन यांच्या रूपाने शिवसेनेला आक्रमक आणि अभ्यासू चेहरा मिळाला आहे.
प्रकाश महाजन यांचा हा निर्णय केवळ वैयक्तिक नसून तो आगामी निवडणुकीच्या रणनीतीचा भाग आहे. महाजन यांनी स्वतः स्पष्ट केले की, वाढतं वय आणि पक्षांतर्गत काही मनाविरुद्ध घडणाऱ्या गोष्टींमुळे त्यांनी मनसे सोडण्याचा निर्णय घेतला. विशेष म्हणजे, त्यांनी स्वतःची ओळख ‘राष्ट्रीय स्वयंसेवक संघाचा कार्यकर्ता’ अशी करून दिली आहे. संघ विचारांशी असलेली ही बांधिलकी आणि आता शिवसेनेच्या हिंदुत्वाच्या विचारधारेसोबत जाणं, हे एकनाथ शिंदे यांच्या पक्षाची ताकद वाढवण्यास मदत करेल.
एकनाथ शिंदे यांच्या शिवसेनेत सध्या विविध पक्षांतील दिग्गज नेत्यांचा ओघ सुरू आहे. आगामी महापालिका निवडणुकीत भाजप आणि शिंदे गट आपली ताकद वाढवण्यासाठी प्रयत्नशील असताना प्रकाश महाजन यांच्यासारख्या वक्तृत्व लाभलेल्या नेत्याचा फायदा शिवसेनेला नक्कीच होईल. महाजन यांची मराठवाड्यातील पकड आणि त्यांचे स्पष्टवक्ते भाषण यामुळे विरोधकांसमोर आव्हान उभे राहू शकते. आजच्या सोहळ्याला मंत्री उदय सामंत यांच्यासह अनेक महत्त्वाचे नेते उपस्थित राहणार असून, हे शक्तीप्रदर्शन आगामी निवडणुकांसाठीचे महत्वाचे मानले जात आहे.
ठाकरे बंधू (राज आणि उद्धव ठाकरे) मुंबईत एकत्र आले असतानाच, प्रकाश महाजन यांनी शिंदे गटाची वाट धरल्याने महायुती विरुद्ध महाविकास आघाडी आणि मनसे असा त्रिकोणी संघर्ष आता अधिक तीव्र होणार आहे. महाजन यांनी यापूर्वी नारायण राणे किंवा इतर नेत्यांशी झालेल्या वादांवरून आपली भूमिका स्पष्ट केली असून, त्यांचा प्रवास आता एका नव्या वळणावर येऊन ठेपला आहे. या पक्षप्रवेशामुळे ठाणे आणि मुंबईच्या राजकीय गणितात नेमका काय बदल होतो, याकडे राजकीय विश्लेषकांचे लक्ष लागले आहे.
