मुंबई: ऑल इंडिया मजलिस-ए-इत्तेहादुल मुसलिमीन (AIMIM) चे अध्यक्ष असदुद्दीन ओवैसी यांनी शनिवारी मुंबईतील एका सभेत केंद्र सरकारवर जोरदार टीका केली. अमेरिकेचे राष्ट्राध्यक्ष डोनाल्ड ट्रम्प यांनी व्हेनेझुएलाचे राष्ट्राध्यक्ष निकोलस मादुरो यांना पकडून अमेरिकेत नेल्याच्या दाव्याचा संदर्भ देत, ओवैसी यांनी पंतप्रधान नरेंद्र मोदी यांना थेट सवाल केला.
ओवैसी म्हणाले की, “आज आपण पाहिलं की अमेरिकेच्या सैन्याने व्हेनेझुएलाचे राष्ट्राध्यक्ष मादुरो यांना त्यांच्या देशातून पकडून अमेरिकेत नेलं. जर अमेरिका असं करू शकते, तर भारत सरकार पाकिस्तानमध्ये लपून बसलेल्या 26/11 दहशतवादी हल्ल्याच्या सूत्रधारांना भारतात का आणू शकत नाही?” त्यांनी हे वक्तव्य करताना केंद्र सरकारच्या दहशतवादविरोधी भूमिकेवर प्रश्नचिन्ह उपस्थित केले.
पंतप्रधान नरेंद्र मोदी, केंद्रीय गृहमंत्री अमित शाह आणि महाराष्ट्राचे मुख्यमंत्री देवेंद्र फडणवीस यांचा उल्लेख करत ओवैसी पुढे म्हणाले, “जर ट्रम्प आपल्या लष्कराला परदेशात पाठवून एखाद्या राष्ट्राध्यक्षाला पकडू शकतात आणि सौदी अरेबिया येमेनवर बॉम्बहल्ले करू शकते, तर भारतानेही पाकिस्तानमध्ये जाऊन 26/11 हल्ल्याचे मास्टरमाइंड, मग तो मसूद अझहर असो किंवा लष्कर-ए-तोयबाचा कोणताही दहशतवादी असो यांना भारतात आणायला हवं.”
ओवैसी यांनी आपल्या भाषणात पंतप्रधानांच्या ‘56 इंचाच्या छाती’ या प्रतिमेचा उल्लेख करत खोचक टीका केली. “मोदीजी, जर 56 इंचाची छाती आहे, तर दहशतवाद्यांना पकडून भारतात आणा,” असे ते म्हणाले. त्यांच्या या विधानामुळे राजकीय वर्तुळात जोरदार चर्चा सुरू झाली आहे.
#WATCH | Mumbai | AIMIM chief Asaduddin Owaisi said, "Today we heard that US President Donald Trump's forces captured Venezuelan President Nicolas Maduro and took him from his country to America. If US President Donald Trump can abduct Venezuelan President Nicolas Maduro from his… pic.twitter.com/OTLyZJ4goK — ANI (@ANI) January 3, 2026
ओवैसी यांचे वक्तव्य अमेरिकेने व्हेनेझुएलामध्ये केलेल्या कथित लष्करी कारवाईच्या पार्श्वभूमीवर आले आहे. ट्रम्प यांनी सोशल मीडियावर पोस्ट करत मादुरो आणि त्यांच्या पत्नीला पकडून न्यूयॉर्कला नेल्याचा दावा केला होता. या कारवाईत अमेरिकन कायदा अंमलबजावणी संस्थांचा सहभाग असल्याचेही ट्रम्प यांनी नमूद केले होते.
दरम्यान, ओवैसी यांच्या या आक्रमक वक्तव्यामुळे देशांतर्गत राजकारणात नवा वाद निर्माण झाला असून, 26/11 हल्ल्याच्या गुन्हेगारांना भारतात आणण्याच्या मुद्द्यावर पुन्हा एकदा तीव्र चर्चा सुरू झाली आहे.
