पटना: बिहारच्या राजकारणात मोठी घडामोड घडली असून मुख्यमंत्री नितीश कुमार यांनी राज्य विधानपरिषद सदस्यत्वाचा राजीनामा दिला आहे. विधानपरिषेदेचे सभापती अवधेश नारायण सिंह यांनी ही माहिती दिली. जनता दल (युनायटेड) पक्षाचे आमदार संजय गांधी यांनी नितीश कुमार यांचा राजीनामा विधानपरिषदेकडे सादर केला.
नितीश कुमार यांची राज्यसभेसाठी निवड 16 मार्च 2026 रोजी झाल्यानंतर नियमांनुसार त्यांना 14 दिवसांच्या आत राज्य विधिमंडळातील पदाचा राजीनामा देणे आवश्यक होते. त्यानुसार त्यांनी अखेर 30 मार्च रोजी आपला राजीनामा सादर केला. ते 10 एप्रिल 2026 रोजी राज्यसभेचे सदस्य म्हणून शपथ घेण्याची शक्यता आहे.
यापूर्वी 27 मार्च 2026 रोजी बिहार विधानसभा अध्यक्ष प्रेम कुमार यांनी नितीश कुमार यांच्याकडे 30 मार्चपर्यंत राजीनामा देण्याची मुदत असल्याचे स्पष्ट केले होते. दरम्यान, त्यांच्या राजीनाम्याच्या पार्श्वभूमीवर जनता दल (युनायटेड) पक्षातील वरिष्ठ नेत्यांनी पटना येथील त्यांच्या अधिकृत निवासस्थानी बैठका घेतल्या. पक्षातील काही गटांनी नितीश कुमार यांनी बिहारमध्येच राहावे, अशी मागणीही केली होती.
नितीश कुमार यांनी 5 मार्च रोजी राज्यसभेसाठी उमेदवारी अर्ज दाखल केला होता. या वेळी केंद्रीय गृहमंत्री अमित शाह उपस्थित होते. या निर्णयामुळे बिहारमधील त्यांच्या सुमारे 20 वर्षांच्या सत्ताकाळाचा शेवट होणार असल्याच्या चर्चांना अधिक बळ मिळाले.
दरम्यान, बिहारचे ग्रामीण विकास मंत्री श्रवण कुमार यांनी 20 मार्च 2026 रोजी असे म्हटले होते की, राज्यसभेत निवडून आल्यानंतरही नितीश कुमार पुढील सहा महिन्यांपर्यंत मुख्यमंत्रीपदावर राहू शकतात. घटनात्मक तरतुदीनुसार, संसद सदस्य झाल्यानंतर 14 दिवसांत राज्य विधिमंडळातील सदस्यत्वाचा राजीनामा देणे आवश्यक असते, मात्र मुख्यमंत्रीपदावर काही कालावधीपर्यंत कायम राहण्याची तरतूद आहे.
सध्या नितीश कुमार यांच्या पुढील राजकीय वाटचालीकडे सर्वांचे लक्ष लागले असून, बिहारच्या मुख्यमंत्रीपदासाठी पुढील चेहरा कोण असेल, याबाबतही उत्सुकता निर्माण झाली आहे.
