महाराष्ट्राच्या राजकारणात पुन्हा एकदा खळबळ उडवणारा दावा समोर आला आहे. काँग्रेसचे प्रदेशाध्यक्ष नाना पटोले यांनी भाजपावर गंभीर आरोप करत, मुख्यमंत्री देवेंद्र फडणवीस यांना मुख्यमंत्रिपदावरून हटवण्यासाठी भाजपातीलच एक गट सक्रिय असल्याचा सनसनाटी दावा केला आहे. या दाव्यामुळे राज्यातील राजकीय वातावरण तापले असून, सत्ताधारी पक्षात अंतर्गत अस्वस्थता असल्याच्या चर्चांना जोर आला आहे.
नागपुरात घेतलेल्या पत्रकार परिषदेत नाना पटोले यांनी भाजपातील घडामोडींवर थेट बोट ठेवलं. त्यांनी सांगितलं की, पक्षातील काही वरिष्ठ नेते जे हालचाली करत आहेत, त्याची माहिती खुद्द मुख्यमंत्री देवेंद्र फडणवीस यांनाही आहे. येत्या काही दिवसांत हा सत्तासंघर्ष उघडपणे समोर येईल, असा दावा पटोलेंनी केला. विशेष म्हणजे, भाजपातील एका प्रभावी नेत्याच्या हालचालींकडे लक्ष वेधत, त्या घडामोडी फडणवीसांच्या माहितीत असल्याचंही त्यांनी स्पष्ट केलं.
पटोलेंनी यावेळी भाजपाच्या नेतृत्वावर जोरदार टीका केली. “सत्तेचा माज भाजपाच्या नेत्यांच्या डोक्यात गेला आहे,” असा आरोप करत त्यांनी भाजपातील नेत्यांना आत्मपरीक्षण करण्याचा सल्ला दिला. काही नेत्यांची वागणूक पाहता, ते सत्तेच्या नशेत वास्तवापासून दूर गेले असल्याचंही त्यांनी सूचकपणे म्हटलं.
याशिवाय, ज्येष्ठ नेते नारायण राणे यांनी निवृत्तीचे संकेत दिल्याचा उल्लेख करत, इतर भाजप नेत्यांनीही त्यांचा आदर्श घ्यावा, असा टोला नाना पटोले यांनी लगावला. सत्ता कायमस्वरूपी नसते, हे भाजपाने लक्षात घ्यायला हवं, असं सांगत त्यांनी राज्यातील जनतेच्या प्रश्नांवर सरकार अपयशी ठरत असल्याचा आरोप केला.
नाना पटोले यांच्या या दाव्यानंतर भाजपाकडून अद्याप अधिकृत प्रतिक्रिया आलेली नाही. मात्र, या आरोपांमुळे राज्याच्या राजकारणात नवे वादळ उठण्याची शक्यता व्यक्त केली जात असून, भाजपातील अंतर्गत समीकरणांकडे सर्वांचं लक्ष लागलं आहे.
