मुंबई शहर उद्या दोन जागतिक महासत्तांच्या प्रमुखांच्या स्वागतासाठी सज्ज होत आहे. भारत-फ्रान्स मैत्रीचे नवे पर्व गिरवण्यासाठी पंतप्रधान नरेंद्र मोदी आणि फ्रान्सचे राष्ट्रपती इमॅन्युएल मॅक्रॉन उद्या मुंबईत दाखल होत असून, या शाही दौऱ्याच्या पार्श्वभूमीवर मुंबईच्या वाहतूक व्यवस्थेत मोठे फेरबदल करण्यात आले आहेत. विशेषतः पश्चिम द्रुतगती महामार्गावर 13 तासांसाठी कडक निर्बंध लादण्यात आल्याने मुंबईकरांना उद्या प्रवासाचे काटेकोर नियोजन करावे लागणार आहे.
या ऐतिहासिक भेटीची सुरुवात मुंबईतील प्रतिष्ठित 'हॉटेल ताज' येथील इंडो-फ्रेंच कल्चरल कार्यक्रमाने होणार आहे. त्यानंतर गेट वे ऑफ इंडियाच्या साक्षीने रंगणाऱ्या एका दिमाखदार सांस्कृतिक सोहळ्याला दोन्ही नेते उपस्थिती लावणार आहेत.
या दौऱ्याचे मुख्य आकर्षण म्हणजे तंत्रज्ञान आणि एआय (AI) क्षेत्रातील सहकार्य वाढवण्यासाठी हे दोन्ही नेते नवी दिल्लीतील 'AI Impact Summit 2026' कडे रवाना होतील, जिथे दोन्ही देशांच्या स्टार्टअप आणि तंत्रज्ञान क्षेत्राला नवी चालना मिळेल.
सुरक्षा आणि सुलभ दळणवळण सुनिश्चित करण्यासाठी मुंबई वाहतूक पोलिसांनी कंबर कसली आहे. वाहतूक विभागाचे डीसीपी अजित बोऱ्हाडे यांनी जाहीर केलेल्या अधिसूचनेनुसार, मंगळवारी सकाळी आठ ते रात्री नऊ वाजेपर्यंत पश्चिम द्रुतगती महामार्गावर (WEH) अवजड वाहनांना पूर्णपणे मज्जाव करण्यात आला आहे. विशेषतः वाकोला उड्डाणपूल ते दहिसर टोल नाका दरम्यान हे निर्बंध लागू राहतील. जड वाहनांमुळे होणारी संभाव्य वाहतूक कोंडी टाळून व्हीआयपी ताफा विनाअडथळा पार व्हावा, हा यामागचा मुख्य उद्देश आहे.
प्रवाशांनी संभाव्य खोळंबा टाळण्यासाठी पर्यायी मार्गांचा अवलंब करावा, असे आवाहन प्रशासनाने केले आहे. मात्र, आपत्कालीन सेवांसाठी हे नियम शिथिल असतील. रुग्णवाहिका आणि अग्निशमन दलाच्या गाड्यांना या मार्गावरून जाण्याची मुभा असेल. कामावर जाणाऱ्या मुंबईकरांनी घरून निघताना वेळेचे नियोजन आणि मार्गांची निवड विचारपूर्वक करावी, जेणेकरून या भव्य दौऱ्याचा त्यांच्या दैनंदिन प्रवासावर कोणताही विपरीत परिणाम होणार नाही.
