केंद्र सरकारने राष्ट्रवादी काँग्रेसच्या खासदार सुप्रिया सुळे यांच्यावर महत्त्वाची जबाबदारी सोपवली आहे. संसदीय कूटनीतीला बळ देण्यासाठी विविध देशांमध्ये जाणाऱ्या सर्वपक्षीय खासदारांच्या शिष्टमंडळाचे नेतृत्व करण्याची संधी त्यांना देण्यात आली आहे. सिंगापूरसोबत होणाऱ्या व्यापारी आणि धोरणात्मक चर्चांमध्ये त्या भारताचे प्रतिनिधित्व करणार आहेत.भारत आणि सिंगापूर यांच्यातील द्विपक्षीय संबंध अधिक दृढ करण्यासाठी हा दौरा महत्त्वाचा मानला जात आहे. व्यापार, गुंतवणूक आणि सहकार्याच्या विविध क्षेत्रांवर चर्चा होणार असून, या प्रक्रियेत संसदीय स्तरावर संवाद वाढवण्यावर भर दिला जाणार आहे. या पार्श्वभूमीवर सुप्रिया सुळे यांच्याकडे नेतृत्वाची धुरा सोपवण्यात आल्याचे सूत्रांनी सांगितले.
या शिष्टमंडळात विविध पक्षांतील खासदारांचा समावेश आहे. महाराष्ट्रातूनही काही प्रमुख नेते या दौऱ्यात सहभागी होणार आहेत. सिंगापूर दौऱ्यासोबतच इतर देशांमध्येही भारतीय प्रतिनिधीमंडळे जाणार आहेत. इंडोनेशिया, अर्जेंटिना, ब्राझील आणि मोरोक्को येथे जाणाऱ्या गटांचे नेतृत्व वेगवेगळ्या खासदारांकडे सोपवण्यात आले आहे.संसदीय डिप्लोमसीच्या माध्यमातून भारताचे आंतरराष्ट्रीय संबंध अधिक बळकट करण्याचा प्रयत्न केंद्र सरकारकडून केला जात आहे. विरोधी पक्षातील नेत्यांनाही या प्रक्रियेत सहभागी करून घेण्याची भूमिका लक्षवेधी मानली जात आहे. त्यामुळे परराष्ट्र धोरणात व्यापक सहकार्याचा संदेश देण्यात येत आहे.
