बारामती: ओबीसी नेते लक्ष्मण हाके यांनी बारामती दौऱ्यातून सुरज चव्हाण यांना प्रत्यूत्तर दिले आहे. राष्ट्रवादी काँग्रेसच्या अजित पवार गटाचे पदाधिकारी सुरज चव्हाण यांनी 'लक्ष्मण हाके यांना महाराष्ट्रात फिरू देणार नाही' असा इशारा दिला होता. या आव्हानाला थेट उत्तर देत हाके यांनी बारामतीत प्रत्यक्ष येऊन दाखवले. त्यांच्या या आगमनाचे ओबीसी कार्यकर्त्यांकडून जल्लोषात स्वागत करण्यात आले.
बारामतीतील पणदरे गावात अहिल्यादेवी होळकर जयंतीनिमित्त आयोजित कार्यक्रमात हाके सहभागी झाले होते. त्यांच्या स्वागतासाठी ओबीसी समाजाच्या युवकांनी फटाक्यांची आतषबाजी करत, जोरदार घोषणांनी परिसर दणाणून सोडला. हाके यांचे आगमन हे कार्यकर्त्यांसाठी केवळ एक राजकीय घटना नसून आत्मसन्मानाचा क्षण ठरला.
लक्ष्मण हाके यांनी आपल्या भाषणात सुरज चव्हाण यांना थेट इशारा देत म्हटले, 'सुरज चव्हाण, आमच्या नादाला लागू नकोस. आम्ही मेंढपाळाची मुलं आहोत. आमचं कोणी थांबवू शकत नाही.' त्यांच्या या वक्तव्याने उपस्थित जनसमुदायामध्ये उसळलेला उत्साह पाहायला मिळाला.
सुरज चव्हाण यांनी हाके यांच्यावर टीका करत त्यांना महाराष्ट्रात फिरू न देण्याची भाषा केली होती, ज्यामुळे ओबीसी समाजात संतापाची लाट उसळली होती. हाके यांचा बारामती दौरा हा केवळ प्रत्युत्तर नव्हे, तर ओबीसी समाजाच्या अस्तित्वाची आणि संघटन शक्तीची प्रचिती देणारा ठरला.
कार्यक्रमाच्या वेळी विविध ओबीसी नेत्यांनीही आपले मनोगत व्यक्त केले. समाजाच्या हक्कांसाठी लढणाऱ्या आणि ओबीसींच्या सन्मानासाठी आवाज उठवणाऱ्या हाके यांना युवांनी नायक म्हणून स्वीकारले आहे, हे त्यांच्या स्वागतावरून स्पष्ट होते. लक्ष्मण हाके यांचा दौरा आणि त्यावरून निर्माण झालेला राजकीय वाद, हे आगामी काळात राज्यातील ओबीसी राजकारणाचे चित्र बदलू शकते.
संपूर्ण प्रकरणात महत्त्वाचे म्हणजे, ओबीसी समाज एकवटत असून त्यांना एका ठोस नेतृत्वाची गरज आहे. हाके यांच्याकडे हा विश्वास वळताना दिसतोय. बारामतीत झालेला हा जल्लोष हे त्या बदलाचे लक्षण असू शकते. पुढील काही दिवसांमध्ये ही चळवळ अधिक तीव्र होण्याची शक्यता नाकारता येत नाही.
