जळगाव: नशिबाने साथ दिली आणि नियतीने हात दिला म्हणून आज जळगाव जिल्ह्यातील 50 हून अधिक प्रवाशांनी मृत्यूच्या दाढेतून परत येत 'पुनर्जन्म' अनुभवला. धुळ्याहून भुसावळकडे निघालेल्या लालपरीने आज महामार्गावर जो थरार अनुभवला, तो कोणत्याही हॉलीवूडपटातील दृश्यापेक्षा कमी नव्हता. सुमारे तीन किलोमीटरपर्यंत विनाब्रेक धावणाऱ्या या अनियंत्रित बसने प्रवाशांच्या काळजाचा ठोका चुकवला. ही केवळ एक तांत्रिक बिघाडाची घटना नसून, प्रवाशांच्या जीवाशी खेळणाऱ्या एसटी महामंडळाच्या ढिसाळ कारभाराचे जिवंत प्रदर्शन आहे.
प्रवासाच्या सुरुवातीला सर्व काही सुरळीत वाटत असतानाच, पारोळा सोडल्यावर बसने तिचे रौद्र रूप दाखवण्यास सुरुवात केली. एरंडोलजवळील धारागीर गावाजवळ पोहोचताच बसच्या मागील भागातून भयावह आवाज येऊ लागला. प्रवाशांना काही समजण्यापूर्वीच चालकाच्या लक्षात आले की, बसचे ब्रेक पूर्णपणे निकामी झाले आहेत. विनाब्रेकची ही बस रस्त्यावर नागमोडी वळणे घेत वेगाने धावू लागली. सुमारे 3 किलोमीटरपर्यंत 50 ते 60 प्रवाशांच्या किंकाळ्यांनी महामार्ग हादरून गेला होता. जणू काही यमदूतच या लालपरीच्या रूपात महामार्गावर धावत होता.
या थरारक प्रवासात एक अत्यंत धक्कादायक बाब समोर आली ती म्हणजे, बस अनियंत्रित असतानाच तिची काही चाके निखळली. चाके नसताना आणि ब्रेक निकामी असतानाही बसचा वेग कमी होत नव्हता. अशा कठीण प्रसंगी चालकाने त्याची सर्व शक्ती एकवटून बसवर नियंत्रण ठेवण्याचा आटोकाट प्रयत्न केला. अखेर, ही बस रस्त्यालगतच्या सुरक्षा कठड्याला (Safety Guardrail) जाऊन जोरदार धडकली. जर तो सुरक्षा कठडा नसता, तर बस दरीत कोसळून मृतांचा आकडा भयावह असता. 'काळ आला होता, पण वेळ आली नव्हती' या म्हणीचा प्रत्यय आज या प्रवाशांना आला.
या भीषण अपघातात बसच्या दर्शनी भागाचा अक्षरशः चक्काचूर झाला आहे. कर्तव्य बजावताना चालक आणि वाहक गंभीर जखमी झाले असून, त्यांना तातडीने धुळे येथील रुग्णालयात हलवण्यात आले आहे. तसेच, बसमधील 15 प्रवासी या अपघातात जखमी झाले असून त्यांच्यावर जळगावच्या शासकीय वैद्यकीय महाविद्यालयात उपचार सुरू आहेत. बहुतांश प्रवाशांना मुका मार लागला असला तरी, त्यांच्या मनावर बसलेला या अपघाताचा ओरखडा दीर्घकाळ कायम राहील.
एसटी महामंडळाच्या बसची ही दुरवस्था पाहून आता सर्वसामान्यांमध्ये संतापाची लाट उसळली आहे. "प्रवाशांच्या सेवेसाठी" हे ब्रीदवाक्य मिरवणाऱ्या महामंडळाने बसच्या देखभालीकडे दुर्लक्ष केल्याचा आरोप प्रवाशांनी केला आहे. रस्त्यावर धावणाऱ्या बसची चाके निखळणे आणि ब्रेक फेल होणे, हे महामंडळाच्या कार्यशाळेतील निष्काळजीपणावर शिक्कामोर्तब करणारे आहे. प्रवाशांचा जीव धोक्यात घालून खिळखिळ्या झालेल्या गाड्या रस्त्यावर उतरवणे हा एक प्रकारे गुन्हाच आहे.
या अपघाताबाबत एसटी महामंडळाकडून अद्याप कोणतीही अधिकृत प्रतिक्रिया देण्यात आलेली नाही. मात्र, या घटनेने सुरक्षित प्रवासाच्या दाव्यांची लक्तरे वेशीवर टांगली आहेत. तांत्रिक बिघाडाचे नाव देऊन हे प्रकरण दडपण्यापेक्षा, याला जबाबदार असणाऱ्या अधिकाऱ्यांवर कठोर कारवाई होण्याची गरज आहे. आज सुरक्षा कठड्यामुळे 50 प्रवाशांचे प्राण वाचले असले तरी, उद्या अशाच एखाद्या खिळखिळ्या बसमुळे मोठा अनर्थ ओढवणार नाही, याची शाश्वती कोण देणार? हा प्रश्न आता अनुत्तरितच आहे.
