देशात NEET पेपरफुटी प्रकरण, विद्यार्थ्यांची आंदोलने, सोनम वांगचुक यांचे आंदोलन आणि शिक्षण व्यवस्थेत बदल करण्याची युवकांची मागणी यामुळे संपूर्ण देशाचे लक्ष या विषयाकडे वेधले गेले आहे. अशातच राजधानी दिल्लीत सुरू झालेली विद्यार्थ्यांची आंदोलनं आता देशाच्या विविध भागांत पसरली आहेत. दिल्लीतील विद्यार्थी आंदोलनावर झालेल्या पोलिस कारवाईचे पडसाद देशभर उमटू लागले. वंचित बहुजन आघाडीने 23 जुलै रोजी महाराष्ट्र बंदची हाक दिली आहे. वंचित बहुजन आघाडीचे अध्यक्ष प्रकाश आंबेडकर यांनी बंदची घोषणा केली.
दिल्लीतील जंतरमंतरवर विद्यार्थ्यांवर झालेल्या लाठीचार्ज आणि पोलिसी बळाच्या वापराच्या निषेधार्थ वंचितने आज महाराष्ट्र बंदची हाक दिली आहे. दिल्लीतील आंदोलनकर्त्या विद्यार्थ्यांवरील कथित लाठीचार्जच्या निषेधार्थ हा बंद पुकारण्यात आल्याचे पक्षाने म्हटले आहे. समविचारी राजकीय पक्ष, विद्यार्थी संघटना आणि नागरिकांनी बंदला पाठिंबा द्यावा, असे आवाहन करण्यात आले. राज्यभर शांततापूर्ण पद्धतीने आंदोलन करण्याचे आवाहन वंचित बहुजन आघाडीकडून करण्यात आले.
दिल्लीतील आंदोलन आणि त्यावरील पोलिस कारवाईमुळे राजकीय वातावरण तापले असून विरोधक केंद्र सरकारवर टीका करत आहेत. बंदच्या पार्श्वभूमीवर राज्यातील प्रमुख शहरांमध्ये पोलिसांकडून सुरक्षा व्यवस्था वाढविण्यात येण्याची शक्यता आहे. अत्यावश्यक सेवा सुरू राहतील की नाही, याबाबत स्थानिक प्रशासनाच्या सूचनांचे पालन करण्याचे आवाहन करण्यात आले आहे. यावेळी अत्यावश्यक सेवा (दवाखाने, मेडिकल, दूध पुरवठा इत्यादी) पूर्णपणे सुरू राहतील. सार्वजनिक वाहतूक व्यवस्था (बसेस आणि लोकल) सामान्यपणे सुरू ठेवण्याचा प्रयत्न आहे, मात्र निदर्शनांमुळे वाहतुकीवर काही प्रमाणात परिणाम होऊ शकतो. आंदोलने झाल्यास, वाहतुकीत व्यत्यय येऊ शकतो आणि रस्ते अडवले जाऊ शकतात.
तसेच काही भाग आणि बाजारपेठांमध्ये दुकाने ऐच्छिक (स्वेच्छेने) बंद राहण्याची शक्यता आहे. दरम्यान, मुंबईतील चैत्यभूमीसह महत्त्वाच्या ठिकाणी पोलिसांनी चोख बंदोबस्त ठेवला आहे. अनुचित प्रकार टाळण्यासाठी काही कार्यकर्त्यांवर खबरदारी म्हणून कारवाई करण्यात आली आहे.
