मुंबई : महायुतीच्या शपथविधी सोहळ्याला हिंदुत्वाचा जोशपूर्ण नारा गाजणार आहे. निवडणुकीदरम्यान गाजलेला ‘एक हैं तो सेफ हैं’ हा नारा शपथविधीतही तोऱ्यात झळकणार आहे. महायुतीने मिळवलेल्या विजयाचा जल्लोष या सोहळ्यात उफाळून येणार असून, भाजपकडून निवडणूक प्रचाराचा प्रभाव शपथविधीच्या कार्यक्रमातही दिसणार आहे.
या शपथविधी सोहळ्यात महायुतीच्या 10,000 हून अधिक कार्यकर्त्यांनी ‘एक हैं तो सेफ हैं’ या आशयाचे टी-शर्ट परिधान करून सहभागी होण्याची तयारी केली आहे. या घोषणेने विजयाची प्रतिकात्मक पुनरावृत्ती करत, एकात्मतेचा आणि सुरक्षिततेचा संदेश देण्याचा महायुतीचा प्रयत्न आहे.शपथविधीचा सोहळा मराठी परंपरा आणि सांस्कृतिक रंगांनी नटलेला असेल. यावेळी मराठी संगीताच्या गूढ लहरींसह विविध सांस्कृतिक कार्यक्रमांचे आयोजन करण्यात आले आहे. यामुळे शपथविधी सोहळा केवळ राजकीयच नव्हे, तर सांस्कृतिक अभिव्यक्तीचा उत्सव ठरणार आहे.
निवडणुकीतील हिंदुत्वाचा नारा आणि एकात्मतेचा संदेश या शपथविधीतूनही पुढे नेण्याचा भाजपचा उद्देश आहे. कार्यकर्त्यांच्या उत्साहाने सोहळ्याला वेगळा उंचाव मिळणार आहे.शपथविधी हा केवळ औपचारिक कार्यक्रम न राहता, समर्थकांच्या उर्जेने भारलेला एक सोहळा ठरणार आहे. महायुतीने निवडणुकीत दाखवलेली एकजूट आणि पुढील कार्यकाळासाठीचा संकल्प याचे प्रतिबिंब या सोहळ्यात पाहायला मिळणार आहे.
