Pet Abandonment Dubai: मध्यपूर्वेत वाढलेल्या तणावाचा परिणाम आता दुबईसारख्या शहरांमध्येही दिसू लागला आहे. इराण आणि इस्राईलमधील संघर्षानंतर निर्माण झालेल्या युद्धजन्य परिस्थितीमुळे दुबईतील अनेक नागरिक शहर सोडण्याचा विचार करत आहेत. मात्र या घाईगडबडीत एक धक्कादायक गोष्ट समोर आली आहे. अनेक लोक आपले पाळीव प्राणी रस्त्यावर सोडून जात असल्याच्या घटना वाढू लागल्या आहेत. या प्रकारामुळे प्राणीप्रेमींमध्ये संताप व्यक्त केला जात आहे.
मिळालेल्या माहितीनुसार, इराणकडून ड्रोन किंवा क्षेपणास्त्र हल्ल्याची भीती निर्माण झाल्यानंतर दुबईतील अनेक परदेशी नागरिक आणि श्रीमंत व्यावसायिक शहर सोडण्याची तयारी करत आहेत. अशा परिस्थितीत अनेकांना आपल्या पाळीव प्राण्यांना सोबत घेऊन जाणे कठीण जात असल्याचे सांगितले जात आहे. विशेषतः दुसऱ्या देशात प्राण्यांना नेण्यासाठी लागणारी कागदपत्रे, वैद्यकीय तपासणी आणि परवानग्या यामुळे ही प्रक्रिया वेळखाऊ ठरते.
या कारणामुळे काही लोकांनी आपले पाळीव कुत्रे आणि मांजरी रस्त्यावर सोडल्याच्या घटना समोर येत आहेत. सोशल मीडियावर दुबईतील काही भागांतील फोटो आणि व्हिडिओ व्हायरल झाले आहेत. त्यामध्ये विजेच्या खांबांना बांधलेले किंवा रस्त्यावर भटकताना दिसणारे कुत्रे दिसत आहेत. अनेक प्राणी उपाशी अवस्थेत आढळून येत असल्याने प्राणी कल्याण संस्थांनी चिंता व्यक्त केली आहे.
दुबईतील काही पशुवैद्यकीय तज्ज्ञांनीही या परिस्थितीबद्दल चिंता व्यक्त केली आहे. त्यांच्या म्हणण्यानुसार, काही प्राणी मालकांनी तर आपल्या पाळीव प्राण्यांना इच्छामृत्यू देण्याची मागणीही केली आहे. हे प्राणी निरोगी असूनही त्यांना सांभाळण्याची जबाबदारी टाळण्यासाठी अशी मागणी होत असल्याचे सांगितले जात आहे. या प्रकारामुळे पशुवैद्यकीय तज्ज्ञ आणि प्राणीप्रेमी दोघेही अस्वस्थ झाले आहेत.
प्राणी कल्याणासाठी काम करणाऱ्या अनेक स्वयंसेवी संस्थांकडे अशा प्राण्यांची संख्या वाढू लागली आहे. दुबईतील काही प्राणी संरक्षण केंद्रांनी सांगितले की, अलीकडच्या काळात त्यांच्याकडे सोडून दिलेल्या प्राण्यांची संख्या मोठ्या प्रमाणात वाढली आहे. अनेक मालक फोन करून आपल्या पाळीव प्राण्यांना कुठे ठेवता येईल का, अशी विचारणा करत आहेत.
युद्धजन्य परिस्थितीमुळे संपूर्ण मध्यपूर्वेत विमानसेवा आणि इतर वाहतूक व्यवस्थेवरही परिणाम झाला आहे. त्यामुळे शहर सोडण्याची घाई करणाऱ्या लोकांना पाळीव प्राणी सोबत घेणे अधिक अवघड होत आहे. या पार्श्वभूमीवर प्राणी कल्याण संस्थांनी नागरिकांना जबाबदारीने वागण्याचे आवाहन केले आहे.
या घटनांमुळे सोशल मीडियावरही मोठ्या प्रमाणात चर्चा सुरू झाली आहे. अनेकांनी पाळीव प्राण्यांना कुटुंबाचा भाग मानून त्यांना अशा परिस्थितीत सोडून देणे चुकीचे असल्याचे मत व्यक्त केले आहे. तज्ज्ञांच्या मते, संकटाच्या काळातही पाळीव प्राण्यांची काळजी घेणे ही मालकांची जबाबदारी आहे.
