नवी दिल्ली: पश्चिम आशियातील वाढत्या तणावाचा परिणाम आता हवाई वाहतुकीवरही दिसू लागला आहे. इंडिगो आणि एअर इंडिया यांसह अनेक विमान कंपन्यांनी संयुक्त अरब अमिरातीतील, विशेषतः दुबईकडे जाणाऱ्या विमानसेवांमध्ये अडथळे येत असल्याबाबत प्रवाशांसाठी सूचना जारी केल्या आहेत. मध्यपूर्वेतील अस्थिर परिस्थितीमुळे काही विमानांचे वेळापत्रक बदलण्यात आले असून काही उड्डाणे रद्द करण्यात आली आहेत.
इंडिगोने सोशल मीडिया प्लॅटफॉर्म X वर माहिती देताना सांगितले की दुबईतील विमानवाहतूक संचालनावर अतिरिक्त निर्बंध लागू करण्यात आले आहेत. या निर्बंधांमुळे अनेक फ्लाइट्सच्या वेळापत्रकात बदल करावे लागले आहेत. त्यामुळे दुबईला जाणाऱ्या किंवा तेथून येणाऱ्या प्रवाशांनी विमानतळावर जाण्यापूर्वी फ्लाइटचे अद्ययावत स्टेटस तपासावे, असे आवाहन करण्यात आले आहे. तसेच प्रवाशांना ताज्या अपडेट्सची माहिती देण्यासाठी नोटिफिकेशनद्वारेही सूचना पाठवल्या जात असल्याचे कंपनीने सांगितले.
Update: Due to the evolving situation in Middle East, flight operations have been further restricted in Dubai, leading to changes in flight schedules. Customers travelling to/from Dubai are requested to check their flight status at https://t.co/ll3K8Px1Ht before leaving for the… https://t.co/j3mr7nyxCv — IndiGo (@IndiGo6E) March 14, 2026
दरम्यान, एअर इंडियानेही संयुक्त अरब अमिरातीतील विमानतळ प्राधिकरणांच्या निर्देशांचे पालन करत 15 मार्च रोजी अनेक नियोजित विमानसेवा कमी केल्याचे जाहीर केले आहे. एअर इंडियाच्या माहितीनुसार दिल्ली ते दुबई दरम्यान केवळ एकच रिटर्न फ्लाइट चालवली जाणार आहे, तर दुबईसाठी नियोजित पाचपैकी चार उड्डाणे रद्द करण्यात आली आहेत.
एअर इंडिया एक्सप्रेसनेही अशाच प्रकारचे निर्बंध लागू केले आहेत. दिल्ली ते दुबई मार्गावर फक्त एकच रिटर्न फ्लाइट चालवली जाणार असून दुबईसाठी नियोजित सहापैकी पाच उड्डाणे रद्द करण्यात आली आहेत. या निर्णयामुळे अनेक प्रवाशांच्या प्रवासाच्या योजनांवर परिणाम होण्याची शक्यता व्यक्त केली जात आहे.
#ImportantUpdate Following instructions from UAE Airport Authorities, Air India and Air India Express are compelled to further curtail their ad‑hoc operations for 15 March 2026. All Air India Express flights planned for the day to and from Abu Dhabi, Ras Al Khaimah and Sharjah… — Air India (@airindia) March 15, 2026
अबू धाबीबाबतही महत्त्वाची माहिती समोर आली आहे. एअर इंडिया एक्सप्रेसच्या आजच्या सर्व पाच नियोजित उड्डाणे रद्द करण्यात आली आहेत. मात्र शारजाह येथून विमानसेवा सुरू ठेवण्याची योजना कंपनीने आखली आहे. शारजाहहून दिल्ली, कन्नूर, कोची, कोझिकोड, मुंबई आणि तिरुवनंतपुरम या शहरांसाठी उड्डाणे नियोजित करण्यात आली आहेत.
मध्यपूर्वेतील वाढत्या तणावामुळे हवाई वाहतूक क्षेत्रावर मोठा परिणाम होत असून परिस्थिती सामान्य होईपर्यंत विमान कंपन्यांकडून वेळोवेळी बदल जाहीर केले जाण्याची शक्यता आहे. त्यामुळे प्रवाशांनी प्रवासापूर्वी त्यांच्या विमानसेवेची अद्ययावत माहिती तपासणे आवश्यक असल्याचे विमान कंपन्यांनी स्पष्ट केले आहे.
हेही वाचा: Kharmas 2026: आजपासून ‘खरमास’ सुरू: संपूर्ण महिनाभर ‘या’ गोष्टी करणे टाळा, अन्यथा…
