मुंबई: 25 जून रोजी तत्कालीन पंतप्रधान इंदिरा गांधी यांनी देशात आणीबाणी लागू केली होती. या घटनेला यंदा 50 वर्षे पूर्ण झाली आहेत. यानिमित्ताने मुंबईतील राजभवन येथे ‘संविधान हत्या दिन’ हा कार्यक्रम आयोजित करण्यात आला. या दिवशी उपमुख्यमंत्री एकनाथ शिंदे यांनी त्यांच्या ‘एक्स’ (ट्विटर) अकाउंटवर यासंदर्भात पोस्ट शेअर केली. चला, याविषयी सविस्तर जाणून घेऊया.
‘एक्स’वरील पोस्टमध्ये एकनाथ शिंदे म्हणाले:
‘आणीबाणी ही केवळ लोकशाहीची हत्या नव्हती, तर ती भारतीय संविधानाच्या मूळ संकल्पनेवर घातलेला घाला होता. हुकूमशाही किती भयानक असते, याची जाणीव भावी पिढ्यांना व्हावी म्हणून हा काळा दिवस लक्षात ठेवणे आवश्यक आहे’, असे ते राजभवन येथे आयोजित ‘संविधान हत्या दिन’ कार्यक्रमात बोलताना म्हणाले.
शिंदे पुढे म्हणाले, ‘राज्य शासनाच्या सामान्य प्रशासन विभागातर्फे आयोजित या कार्यक्रमात मनोगत व्यक्त करताना, आणीबाणीच्या काळात देशाने अनुभवलेल्या हुकूमशाहीच्या कटू आठवणींना उजाळा देण्यात आला. तसेच, त्या काळात देशाच्या लोकशाहीसाठी संघर्ष करणाऱ्या ज्ञात-अज्ञात वीरांना वंदन करण्यात आले’.
‘1975 साली तत्कालीन पंतप्रधान इंदिरा गांधी यांनी आणीबाणी लागू केली होती. त्या घटनेला 50 वर्षे पूर्ण होत असल्याच्या पार्श्वभूमीवर ‘संविधान हत्या दिन’ पाळण्यात आला. भारतीय संविधानाच्या प्रस्तावनेची सुरुवात ”We the People of India” अशी आहे. मात्र, आणीबाणीच्या काळात यातील ”People” म्हणजेच सामान्य जनतेला दडपण्याचा प्रयत्न झाला’, असेही त्यांनी नमूद केले.
शिंदे म्हणाले, ‘आणीबाणी लादणाऱ्या इंदिरा गांधींना नंतर जनतेच्या रोषाला सामोरे जावे लागले आणि त्यांचा पराभव झाला. याउलट, आताचे मोदी सरकार हे फारच सहिष्णू आहे. कितीही टोकाची टीका झाली, तरीही आकसाने कोणतीही कारवाई केली जात नाही’, असे त्यांनी स्पष्टपणे सांगितले.
? राजभवन, #मुंबई | आणीबाणी ही केवळ लोकशाहीची हत्याचं नव्हती, तर संविधानाच्या मूळ संकल्पनेवर घातलेला घाला होता. हुकूमशाहीचा वरवंटा किती भयानक असतो याची जाणीव भावी पिढ्यांना व्हावी यासाठी हा काळा दिवस लक्षात ठेवायला हवा अशी अपेक्षा आज राजभवन येथे आयोजित 'संविधान हत्या… pic.twitter.com/3Mg9Sb7xj0 — Eknath Shinde – एकनाथ शिंदे (@mieknathshinde) June 25, 2025
या कार्यक्रमास महामहीम राज्यपाल सी. पी. राधाकृष्णन, उपमुख्यमंत्री देवेंद्र फडणवीस, विधान परिषदेच्या उपसभापती डॉ. नीलम गोऱ्हे, कौशल्यविकास मंत्री मंगलप्रभात लोढा, माहिती तंत्रज्ञान मंत्री आशिष शेलार, आदिवासी विकास मंत्री अशोक उईके आणि अनेक मान्यवर तसेच लोकप्रतिनिधी उपस्थित होते.
