मुंबई :महाराष्ट्राच्या राजकारणात पुन्हा एकदा सोशल मीडिया पोस्टवरून मोठा वाद निर्माण झाला आहे. महाराष्ट्र काँग्रेसने आपल्या अधिकृत सोशल मीडिया खात्यावर उपमुख्यमंत्री सुनेत्रा पवार यांच्याबाबत केलेल्या एका पोस्टमुळे सत्ताधारी आणि विरोधकांमध्ये आरोप-प्रत्यारोपांची नवी फेरी सुरू झाली आहे. या पोस्टमध्ये सुनेत्रा पवार यांचा ‘गुंगी गुडीया’ असा उल्लेख करण्यात आल्याने महायुतीतील नेत्यांनी तीव्र आक्षेप नोंदवत काँग्रेसने माफी मागावी, अशी मागणी केली आहे. वादाची सुरुवात बीड येथे झालेल्या एका पत्रकार परिषदेनंतर झाली. या पत्रकार परिषदेतील एक व्हिडिओ सोशल मीडियावर शेअर करत काँग्रेसने उपमुख्यमंत्री सुनेत्रा पवार यांच्यावर अप्रत्यक्ष टीका केली. संबंधित पोस्टमध्ये वापरण्यात आलेल्या शब्दांमुळे राजकीय वातावरण चांगलेच तापले असून दोन्ही बाजूंनी जोरदार प्रतिक्रिया उमटत आहेत.
नेमकं काय आहे प्रकरण?
बीडमधील पत्रकार परिषदेदरम्यान काही प्रश्नांवर चर्चा सुरू असताना सुनेत्रा पवार बोलणार असल्याचा दावा करत काँग्रेसने एक व्हिडिओ शेअर केला. त्या व्हिडिओमध्ये राष्ट्रवादी काँग्रेसचे ज्येष्ठ नेते धनंजय मुंडे यांनी त्यांना बोलण्यापासून रोखल्याचा आरोप काँग्रेसने केला. याच संदर्भात सोशल मीडियावर ‘गुंगी गुडीया’ असा उल्लेख करत पोस्ट करण्यात आली. ही पोस्ट काही वेळातच चर्चेचा विषय ठरली.
महायुतीचा तीव्र विरोध
काँग्रेसच्या या पोस्टनंतर महायुतीतील नेत्यांनी संतप्त प्रतिक्रिया दिल्या. राष्ट्रवादी काँग्रेसचे नेते अमोल मिटकरी यांनी काँग्रेसवर निशाणा साधत ही पोस्ट महिलांचा अपमान करणारी असल्याचे म्हटले. त्यांनी काँग्रेसने तात्काळ संबंधित पोस्ट हटवून सार्वजनिक माफी मागावी, अशी मागणी केली. मिटकरी यांनी असेही स्पष्ट केले की, पत्रकार परिषदेदरम्यान पत्रकारांच्या प्रश्नांना उत्तरे दिल्यानंतर वारंवार त्याच प्रश्नांची पुनरावृत्ती होत असल्यामुळे चर्चा थांबली होती. मात्र, त्या प्रसंगाचा चुकीचा अर्थ लावत काँग्रेसने दिशाभूल करणारी पोस्ट केली, असा आरोप त्यांनी केला.
