पुणे: संत तुकाराम महाराजांच्या 340व्या पालखी सोहळ्याला 18 जूनपासून सुरुवात होत असून देहू येथून पालखीचे पंढरपूरकडे प्रस्थान होणार आहे. यंदाच्या पालखी सोहळ्यासाठी संत तुकाराम महाराज संस्थानने जोरदार तयारी केली आहे. चांदीच्या रथावर रोषणाई करण्यात आली आहे. आषाढी वारीसाठी दुपारी 2:30 वाजता संत तुकाराम महाराजांची पालखी देहूतून प्रस्थान होत आहे. या सोहळ्यासाठी मुख्यमंत्री देवेंद्र फडणवीस, उपमुख्यमंत्री अजित पवार, केंद्रीय राज्यमंत्री मुरलीधर मोहोळ उपस्थित राहणार आहेत, अशी माहिती पालखी सोहळा प्रमुख दिलीप महाराज मोरे यांनी दिली.
तुका म्हणे माझे, हेचि सर्व सुख, पाहिन श्रीमुख आवडीने।। देहू येथे जगद्गुरु संतश्रेष्ठ श्री तुकाराम महाराज मंदिरात जाऊन तुकोबांचे दर्शन घेतले व पूजा केली. याचबरोबर बा विठ्ठल-रुक्मिणी माता, श्रीराम-सीतामाता, तुकोबांचे शिळा मंदिर, श्रीमंत नवशा गणपती मंदिर याठिकाणी देखील दर्शनाचा… pic.twitter.com/IcZcitgLWF — Ajit Pawar (@AjitPawarSpeaks) June 18, 2025
सुरक्षेच्या कारणास्तव, मंदिराच्या आत 42 आणि बाहेर 8 कॅमेरे बसवण्यात आले आहेत. मंदिराचा शिखर फुलांनी सजवण्यात आला आहे. यावर्षी संस्थानने बैलांच्या तीन नवीन जोड्या खरेदी केल्या आहेत आणि अकलूजचे मोहिते-पाटील यांचा आदरणीय घोडा आज देहूत प्रवेश करेल.
असा असेल पालखीचा मुक्काम:
18 जून – देहू
19 जून – आकुर्डी
20 जून – नाना पेठ, पुणे
21 जून – निवडुंगा विठ्ठल मंदिर, पुणे
22 जून – लोणी काळभोर
23 जून – यवत
24 जून – वरखंड
25 जून – उंडवडी गवळ्याची
26 जून – बारामती
27 जून – संसर
28 जून – निमगाव केतकी
29 जून – इंदापूर
30 जून – सराटी
1 जुलै – अकलूज
2 जुलै – बोरगाव श्रीपूर
3 जुलै – पिराची कुरोली
4 जुलै – वाखरी
5 जुलै – पंढरपूर
