मुंबई: नाशिकमधील स्वयंघोषित भोंदू बाबा अशोक खरात प्रकरणामुळे राज्यातील राजकारण तापले असताना आता या प्रकरणावर शिवसेना (शिंदे गट)चे आमदार संजय गायकवाड यांनी त्यांची ठाम भूमिका मांडली आहे.
गायकवाड म्हणाले की, “आपला देश हा साधुसंतांचा देश आहे. अनेक राजकीय नेते धार्मिक आणि आध्यात्मिक आहेत. त्यामुळे एखाद्या ठिकाणी चांगले आध्यात्मिक स्थान असल्याची माहिती मिळाली, तर उपमुख्यमंत्री एकनाथ शिंदे किंवा दीपक केसरकर यांसारखे नेते त्या ठिकाणी जातात, यात काही गैर नाही.”
“फोटो किंवा फोन म्हणजे सहभाग नाही”
ते पुढे म्हणाले की, “एखाद्या व्यक्तीसोबत फोटो काढला किंवा फोनवर संपर्क झाला म्हणून त्या व्यक्तीच्या गैरकृत्यांमध्ये सहभागी असल्याचा आरोप करणे चुकीचे आणि निंदनीय आहे. अशा प्रकारची कोणतीही तरतूद भारतीय कायद्यात नाही.” गायकवाड यांनी स्पष्ट केले की, “अशोक खरात किती खोटारडा आहे आणि त्याने काय केले आहे, हे आता समोर आले आहे. त्याने जसे महिलांना फसवले, तसेच अनेक नेते आणि अधिकाऱ्यांनाही त्याने फसवले आहे.”
अंजली दमानिया यांच्यावर टीका
या प्रकरणावर सातत्याने आरोप करणाऱ्या सामाजिक कार्यकर्त्या अंजली दमानिया यांच्यावरही गायकवाड यांनी टीका केली. “एकनाथ शिंदे किंवा इतर राजकीय नेत्यांची नावे घेऊन प्रसिद्धी मिळवण्याचा प्रयत्न करू नये. त्याऐवजी या प्रकरणातील पीडित महिलांना न्याय मिळवून देण्याचे काम करावे,” असे ते म्हणाले. तसेच सुषमा अंधारे यांच्याकडूनही या प्रकरणावर आरोप करण्यात येत असल्याच्या पार्श्वभूमीवर गायकवाड यांनी विरोधकांवर निशाणा साधला.
सीडीआर अहवाल आणि सत्य
गायकवाड म्हणाले की, “सीडीआर तपासातून जो अहवाल येईल, तो समोर आल्यानंतरच वस्तुस्थिती स्पष्ट होईल. फोन कॉल्स हे केवळ संवादासाठी असू शकतात, त्याचा गैरकृत्यांशी संबंध असल्याचे गृहित धरणे योग्य नाही.”
दरम्यान, या प्रकरणात अनेक राजकीय नेत्यांची नावे चर्चेत येत असल्याने वातावरण अधिकच तापले आहे. मात्र, अधिकृत तपास अहवाल समोर येईपर्यंत निष्कर्ष काढणे योग्य नसल्याचे मतही व्यक्त केले जात आहे. एकूणच, अशोक खरात प्रकरणावरून आरोप-प्रत्यारोपांची मालिका सुरू असून येत्या काळात या प्रकरणाला आणखी कोणते वळण मिळते, याकडे राज्याचे लक्ष लागले आहे.
