मुंबई: ज्येष्ठ गायिका आशा भोसले यांचं निधन झालं आहे. काल 11 एप्रिल रोजी आशा भोसले यांना हृदयविकाराचा झटका आला होता. त्यामुळे त्यांना उपचारासाठी मुंबईतील ब्रीच कँडी रुग्णालयात दाखल करण्यात आले होते. दरम्यान आज त्यांचे दु:खद निधन झाले असून उद्या सकाळी अंतिम दर्शनासाठी लोअर परळ येथील निवासस्थानी अंत्यदर्शनासाठी त्यांचे पार्थिव ठेवलं जाईल. तर उद्या सायंकाळी त्यांच्यावर अंतिम संस्कार होणार आहेत. दादर शिवाजी पार्क स्मशानभूमी येथे त्यांच्यावर अंत्यसंस्कार होतील. आशा भोसले यांच्या निधनानंतर चित्रपटसृष्टीमध्ये हळहळ व्यक्त केली जात आहे.
1960-70 च्या दशकातील हिंदी गाण्यांचा सुवर्णकाळ आजही रसिकांच्या मनात जिवंत आहे. त्या काळात संगीत केवळ मनोरंजन नव्हते, तर भावनांचा एक सुंदर प्रवास होता. लता मंगेशकर यांच्यापासून किशोर कुमार पर्यंत अनेक दिग्गजांनी त्यांचा आवाज दिला, ज्यांची गाणी आजही तितकीच लोकप्रिय आहेत. मात्र आशा भोसले यांची शैली काहीशी वेगळी होती. त्यांच्या गाण्यांमध्ये एक वेगळीच ऊर्जा आणि धाडस दिसून येत असे, ज्यामुळे श्रोते अक्षरशः थिरकायला लागायचे.
आशा भोसले यांनी त्यांच्या कारकिर्दीत अनेक बोल्ड, रोमँटिक आणि सेन्स्युअस गाणी गायली. त्या काळात अशा प्रकारची गाणी सादर करणे हे धाडसाचे पाऊल मानले जात होते. त्यांनी नेहमीच पारंपरिक चौकटीबाहेर जाऊन स्वतःची स्वतंत्र ओळख निर्माण करण्याचा प्रयत्न केला. लता मंगेशकर यांच्यापेक्षा वेगळा मार्ग निवडत त्यांनी संगीतविश्वात स्वतःचे खास स्थान निर्माण केले.
हेही वाचा: Asha Bhosle Passed Away : मोठी बातमी! ज्येष्ठ गायिका आशाताई भोसले यांचे निधन
याच धाडसी प्रवासात त्यांचे एक गाणे प्रचंड वादात सापडले होते. 1971 मध्ये प्रदर्शित झालेल्या हरे रामा हरे कृष्णा या चित्रपटातील “दम मारो दम” हे गाणे त्या काळात खूप चर्चेत आले. या गाण्यात जीनत अमान यांना दाखवण्यात आले होते. गाण्यातील दृश्यांमध्ये नशेचे चित्रण आणि धार्मिक शब्दांचा वापर यामुळे अनेकांनी आक्षेप घेतला.
या गाण्यावर आरोप करण्यात आला की ते नशेला प्रोत्साहन देत आहे आणि भारतीय संस्कृतीवर विपरीत परिणाम करत आहे. काही ठिकाणी या गाण्याच्या प्रसारणावर बंदी घालण्यात आली होती. रेडिओ आणि दूरदर्शनवरही या चित्रपटाच्या प्रसारणावर निर्बंध लावण्यात आले, ज्यामुळे हा वाद अधिकच चर्चेचा ठरला होता.
तथापि, काळाच्या ओघात “दम मारो दम” हे गाणे एक कल्ट क्लासिक ठरले. आजही हे गाणे ऐकले की जुन्या आठवणी ताज्या होतात. आशा भोसले यांच्या आवाजातील वेगळेपणा आणि धाडसामुळे हे गाणे आजही लोकप्रियतेच्या शिखरावर आहे.
एकंदरीत, आशा भोसले यांनी केवळ गाणी गायली नाहीत, तर त्यांनी संगीताच्या चौकटी मोडून नवा ट्रेंड निर्माण केला. त्यांच्या धाडसी शैलीमुळेच त्या आजही भारतीय संगीतविश्वातील एक अजरामर नाव ठरतात. आशा भोसले यांच्या संगीत विश्वातील कार्याला सलाम.
