Raj Thackeray On NCP President: दिवंगत उपमुख्यमंत्री अजित पवार यांच्या निधनानंतर राष्ट्रवादी काँग्रेसच्या रिक्त झालेल्या अध्यक्षपदावरून आता राजकीय कलगीतुरा रंगू लागला आहे. या वादात मनसे प्रमुख राज ठाकरे यांनी थेट उडी घेत अत्यंत आक्रमक भूमिका मांडली आहे. ‘राष्ट्रवादीसारख्या रांगड्या मराठी पक्षाचा अध्यक्ष हा मराठी माणूसच असायला हवा,’ असे म्हणत त्यांनी प्रफुल्ल पटेल यांच्या नावाला अप्रत्यक्षपणे विरोध दर्शवला आहे.
राज ठाकरेंच्या ‘एक्स’ पोस्टने खळबळ
महाराष्ट्राच्या सध्याच्या राजकीय परिस्थितीवर संताप व्यक्त करताना राज ठाकरेंनी सोशल मीडियावर आपली भूमिका स्पष्ट केली. ते म्हणाले की, ‘महाराष्ट्राच्या राजकारणाचा सध्या जो विचका झाला आहे, त्यावर बोलण्याचीही इच्छा होत नाही. पण राष्ट्रवादी काँग्रेस हा अस्सल मराठमोळ्या मातीतला पक्ष आहे. या पक्षाचे नेतृत्व कोणीही मराठी असावा, पाटील असावा पण पटेल नको, हे माझे ठाम मत आहे.’
प्रफुल्ल पटेल विरुद्ध ‘मराठी चेहरा’
अजित पवारांच्या पश्चात पक्षाची कमान कोणाकडे जाणार, यावरून पक्षात दोन गट पडल्याची चर्चा आहे. प्रफुल्ल पटेल सध्या पक्षाचे कार्यकारी अध्यक्ष आहेत. सुनेत्रा पवार यांनी उपमुख्यमंत्रिपदाची शपथ घेतल्याने त्या सरकारमध्ये व्यस्त राहतील, असा तर्क लावून पटेल अध्यक्षपदासाठी मोर्चेबांधणी करत असल्याचे बोलले जाते. राज ठाकरेंनी ‘पाटील’ हा शब्द वापरून पक्षातील इतर ज्येष्ठ नेत्यांना किंवा कुटुंबातील सदस्यांना पाठबळ दिले असून, पटेलांच्या माध्यमातून पक्षावर अमराठी वर्चस्व येऊ नये, असा इशारा दिला आहे.
महाराष्ट्राच्या राजकारणाचा गेल्या काही काळात पार विचका झाला आहे त्यावर खरंतर भाष्य पण करावं असं वाटत नाही. पण तरीही आज दिवसभर ज्या घडामोडी सुरु आहेत त्यावर बोलावंच लागेल.
राष्ट्रवादी काँग्रेस पक्षासारख्या अस्सल मराठमोळ्या मातीतला, आणि रांगड्या पक्षाचा अध्यक्ष हा कोणीही मराठी… — Raj Thackeray (@RajThackeray) January 31, 2026
पवार कुटुंबाच्या भूमिकेकडे लक्ष
दरम्यान, सुनेत्रा पवार आता उपमुख्यमंत्री झाल्या आहेत, मात्र पक्ष संघटनेवर पकड कुणाची राहणार? हा प्रश्न कायम आहे. राज ठाकरेंच्या या विधानानंतर पक्षात ‘मराठी विरुद्ध अमराठी’ असा नवा वाद उफाळून येण्याची शक्यता आहे. तसेच, यामुळे दोन्ही राष्ट्रवादीच्या विलीनीकरणाच्या प्रक्रियेत नवी अडचण निर्माण होऊ शकते.
