मुंबई: राजकारणात अनेकदा 'पक्षाची शिस्त' आणि 'आघाडीचा धर्म' पाळताना नेत्यांना इच्छांना मुरड घालावी लागते. महाविकास आघाडीच्या (मविआ) महावृक्षाखाली सध्या अशाच एका त्यागाची आणि त्यातून जन्मलेल्या अस्वस्थतेची चर्चा राजकीय वर्तुळात रंगली आहे. राज्यसभेच्या सात जागांपैकी महाविकास आघाडीच्या वाट्याला आलेल्या एका जागेवर ज्येष्ठ नेते शरद पवार यांची वर्णी लागली खरी, मात्र या निर्णयामुळे शिवसेना (उद्धव बाळासाहेब ठाकरे) पक्षाचे युवा नेते आदित्य ठाकरे यांच्या मनातील 'सल' आता जाहीरपणे समोर आली आहे. "आम्ही सर्वात मोठा पक्ष असूनही संधी तिसऱ्या क्रमांकाच्या पक्षाला मिळाली," अशा शब्दांत आदित्य ठाकरेंनी आपली व्यथा मांडली असून, यामुळे आघाडीत अंतर्गत धुसफूस असल्याची चर्चा सुरू झाली आहे.
राज्यसभेच्या या एका जागेसाठी शिवसेना (उबाठा) सुरुवातीपासूनच आग्रही होती. संसदेच्या वरिष्ठ सभागृहात आपल्या पक्षाचा आक्रमक चेहरा असावा, अशी आदित्य ठाकरेंची भूमिका होती. मात्र, जेव्हा शरद पवारांचे नाव पुढे आले, तेव्हा मविआच्या मित्रपक्षांनी त्यांच्या अनुभवाचा मान राखत त्यांच्याच नावावर शिक्कामोर्तब केले.
या निर्णयावर बोलताना आदित्य ठाकरे म्हणाले की, "आम्ही मविआमध्ये काही नियम पाळत होतो. त्यानुसार सर्वात मोठ्या पक्षाला पहिली संधी मिळणे अपेक्षित होते. आमचे आमदार जास्त असतानाही केवळ वाद नको आणि इंडिया आघाडीची वज्रमूठ कायम राहावी, म्हणून आम्ही मातोश्रीवर झालेल्या बैठकीत काँग्रेस आणि राष्ट्रवादीच्या निर्णयाला संमती दिली."
आदित्य ठाकरेंची ही नाराजी केवळ एका जागेपुरती मर्यादित नसून, ती भविष्यातील राजकीय संधींच्या गणिताशी जोडलेली आहे. त्यांच्या मते, ही संधी हातची गेल्यामुळे आता शिवसेना (उबाठा) पक्षाला थेट 2029 पर्यंत वाट पाहावी लागण्याची शक्यता आहे. "आताची संधी गेली, 2028 मध्ये काँग्रेस दावा करेल किंवा इतर इच्छुक पुढे येतील. या गोंधळात मतांचा कोटा वाढत जातोय. त्यामुळे मी जे काही सांगत होतो, ते निस्वार्थीपणे केवळ माझ्या पक्षाच्या हितासाठी होते," असे स्पष्ट करत त्यांनी भूमिकेचे समर्थन केले. त्यांच्या या वक्तव्यामुळे 'मोठा भाऊ' म्हणून शिवसेनेने दिलेला बळी पक्षाच्या कार्यकर्त्यांना रुचला नसल्याचेच संकेत मिळत आहेत.
राजकीय विश्लेषकांच्या मते, आदित्य ठाकरेंनी हे विधान करून मित्रपक्षांना एक प्रकारे सूचक इशारा दिला आहे. 'मातोश्री'वर झालेल्या बैठकीत जेव्हा काँग्रेस आणि राष्ट्रवादीचे एकमत झाले, तेव्हा शिवसेनेने नमती भूमिका घेतली असली, तरी ती कायमस्वरूपी नसेल, असेच त्यांच्या बोलण्यातून ध्वनित होत आहे. "आम्हाला कुठेही वाद नको होता," असे ते वारंवार सांगत असले, तरी नियमांना बगल देऊन झालेल्या या वाटपामुळे शिवसेनेच्या गोटात भविष्यातील रणनीतीबाबत गांभीर्याने विचार सुरू झाला आहे.
एकूणच, शरद पवारांची राज्यसभेवर झालेली बिनविरोध निवड ही महाविकास आघाडीसाठी विजयाची वाटत असली, तरी आदित्य ठाकरेंनी व्यक्त केलेली ही भावना आघाडीच्या भविष्यातील जागावाटपावर सावट टाकू शकते. महाराष्ट्राच्या राजकारणातील हा 'सायलेंट' संघर्ष आगामी विधानसभा निवडणुकीत कोणत्या वळणावर जातो, याकडे आता सर्वांचे लक्ष लागले आहे.
