काल विधानभवनात भाजप आमदार नितेश राणे यांनी शिवसेना उद्धव बाळासाहेब ठाकरे आमदार आदित्य ठाकरे यांच्यावर कॉफीवरून मिश्किल टोला लगावला होता. त्यानंतर आज आदित्य ठाकरे कॉफी घेऊन विधानभवनात दाखल झाले. मुंबई वॉटर मेट्रो प्रकल्पावर सभागृहात चर्चा सुरू असताना नितेश राणे बोलताना म्हणाले की, एमएमआर क्षेत्र वॉटर मेट्रोने जोडले जाणार असून नरिमन पॉईंटला पोहोचण्यासाठी पोहण्याची गरज नाही किंवा पेंग्विनलाही डिस्टर्ब करायची गरज नाही. जुहू–बांद्रा मार्गे थेट नरिमन पॉईंटला जाईन,” असा टोला त्यांनी लगावला.
यावर आदित्य ठाकरे यांनी “चिकन भेटतं का?” असा प्रश्न उपस्थित करत प्रत्युत्तर दिलं. त्यावर राणे यांनी “हो, तुम्हाला चिकन आणि कोल्ड कॉफी देतो, मला माहिती आहे तुम्हाला कोल्ड कॉफी आवडते,” असं म्हणत वातावरणात हशा पिकवला होता. या पार्श्वभूमीवर आज आदित्य ठाकरे कॉफी घेऊन विधानभवनात आल्याचे पाहायला मिळाले.
