छत्रपती संभाजीनगर, २५ डिसेंबर २०२३, प्रतिनिधी : छत्रपती संभाजीनगर शहराला पाणीपुरवठा करणाऱ्या जायकवाडी येथील नाथसागरमध्ये ४३.१२ टक्के पाणीसाठा आहे. यामुळे शहरातील नागरिकांना पाणीटंचाईचा सामना करावा लागत आहे. जायकवाडी धरणातील पाणीसाठा संपत आल्यामुळे छत्रपती संभाजीनगर शहरासह मराठवाड्यातील जालना, बीड, माजलगाव या जिल्ह्यांना देखील पाणीटंचाईला सामोरे जावे लागणार आहे. नव्या वर्षाची सुरुवात होण्याआधीच ही परिस्थिती निर्माण झाली आहे. यामुळे पावसाचे आगमन होईपर्यंत आणखी सहा ते आठ महिने नागरिकांचे हाल होण्याची शक्यता आहे. प्रशासनाने नागरिकांना पाणी जपून वापरण्याचे आवाहन केले आहे.
