Pink Platform : मुंबईच्या उपनगरीय रेल्वेने दररोज प्रवास करणाऱ्या लाखो महिला प्रवाशांचा प्रवास अधिक सुखकर आणि सुरक्षित करण्यासाठी रेल्वे प्रशासनाने एक अत्यंत महत्त्वपूर्ण पाऊल उचलले आहे. मध्य रेल्वेच्या मुख्यालयात पार पडलेल्या उपनगरीय रेल्वे प्रवासी सल्लागार समितीच्या (SRUCC) बैठकीत 'पिंक प्लॅटफॉर्म' उभारणीच्या संकल्पनेवर सविस्तर चर्चा झाली. या उपक्रमामुळे गर्दीच्या वेळेत महिला प्रवाशांना होणारी धावपळ थांबण्यास मोठी मदत होणार आहे.
महिलांच्या डब्याची ओळख होणार सोपी; गर्दीत होणार नाही धावपळ
सध्या रेल्वे स्थानकांवर योग्य माहिती न मिळाल्यामुळे किंवा डब्याचे स्थान न समजल्याने अनेकदा महिला प्रवाशांना चुकीच्या ठिकाणी उभे राहावे लागते. परिणामी, गाडी आल्यावर डब्यापर्यंत पोहोचताना प्रचंड कसरत करावी लागते. या समस्येवर तोडगा म्हणून स्थानकावर ज्या ठिकाणी महिलांचा डबा थांबतो, तो भाग विशेष गुलाबी रंगाने हायलाइट केला जाणार आहे. यामुळे नव्या आणि नियमित प्रवाशांना महिलांचा डबा नेमका कुठे थांबेल हे लांबूनच सहज ओळखता येईल.
हेही वाचा – BMC Doctors Strike: 5 ऑगस्टपासून BMC रुग्णालयांतील OPD सेवा बंद; निवासी डॉक्टरांचा संप
सुरक्षा व्यवस्थेत वाढ; प्रमुख स्थानकांवर प्रायोगिक तत्त्वावर होणार सुरुवात
स्थानकांवरील या गुलाबी रंगाने चिन्हांकित केलेल्या भागात विशेष सुरक्षा व्यवस्था तैनात केली जाणार आहे. यामध्ये हाय-टेक सीसीटीव्ही कॅमेऱ्यांची नजर आणि महिला सुरक्षा कर्मचाऱ्यांची उपस्थिती वाढवणे सोपे होणार असल्याचे प्रवासी संघटनांचे म्हणणे आहे. रेल्वे अधिकाऱ्यांच्या माहितीनुसार, या प्रस्तावाला अंतिम मंजुरी मिळाल्यानंतर सुरुवातीला मुंबईतील काही गर्दीच्या आणि मुख्य स्थानकांवर प्रायोगिक तत्त्वावर ही योजना राबवली जाईल आणि त्यानंतर टप्प्याटप्प्याने इतर स्थानकांवर विस्तार केला जाईल.
