Weather Update: दिल्ली आणि उत्तर भारतातील अनेक भागात उन्हाची तीव्रता वाढत आहे. राजधानीत गुरुवार हा हंगामातील सर्वात उष्ण दिवस होता. दरम्यान, भारतीय हवामानशास्त्र विभागाने (IMD) आता इशारा दिला आहे की पुढील काही दिवसांत वायव्य भारतातील अनेक भागात तीव्र उष्णता जाणवणार आहे. भारतीय हवामानशास्त्र विभागाने (IMD) शुक्रवारी माहिती दिली की, पुढील 6 दिवस वायव्य भारतातील अनेक भागात उष्णतेची लाट कायम राहू शकते. या काळात, दिल्लीतील तापमान 6 आणि 7 एप्रिल रोजी 42 अंश सेल्सिअसपर्यंत पोहोचू शकते.
कोणत्या राज्यांवर परिणाम होईल?
उष्णतेच्या लाटेचा सर्वाधिक परिणाम दिल्ली, दक्षिण हरियाणा, पश्चिम उत्तर प्रदेश, हिमाचल प्रदेश, पंजाब, गुजरात, राजस्थान, पश्चिम मध्य प्रदेश येथे दिसून येईल. या भागातील कमाल तापमान 2 ते 4 अंशांनी वाढू शकते.
हेही वाचा – वक्फ दुरुस्ती विधेयकाला सर्वोच्च न्यायालयात आव्हान! काँग्रेस खासदार मोहम्मद जावेद यांनी दाखल केली याचिका
एप्रिल ते जून या काळात कडक उष्णता –
हवामान खात्याने वर्तवलेल्या अंदाजानुसार, एप्रिल ते जून या काळात संपूर्ण भारतात सामान्यपेक्षा जास्त उष्णता असू शकते. यावेळी मध्य भारत, पूर्व भारत आणि वायव्य मैदानी भागात उष्णतेच्या लाटेचे दिवस जास्त असू शकतात. भारतात एप्रिल ते जून दरम्यान साधारणपणे 4 ते 7 उष्णतेच्या लाटेचे दिवस असतात, परंतु यावर्षी काही राज्यांमध्ये ही संख्या 10 ते 11 दिवसांपर्यंत वाढू शकते.
या राज्यांना उष्णतेच्या लाटेचा फटका –
दरम्यान, हवामान खात्याच्या म्हणण्यानुसार, राजस्थान, गुजरात, हरियाणा, पंजाब, मध्य प्रदेश, महाराष्ट्र, उत्तर प्रदेश, बिहार, झारखंड, पश्चिम बंगाल, ओडिशा, छत्तीसगड, तेलंगणा, आंध्र प्रदेश, कर्नाटक आणि तामिळनाडूच्या उत्तरेकडील भागात उष्णतेच्या लाटेचे दिवस अधिक असतील.
तथापि, 2024 हे वर्ष भारतासाठी आणि संपूर्ण जगासाठी आतापर्यंतचे सर्वात उष्ण वर्ष ठरले आहे. या वर्षाची पहिली उष्णतेची लाट 5 एप्रिल रोजी नोंदवली गेली, परंतु फेब्रुवारीच्या अखेरीस अनेक भागांमध्ये उष्ण वारे जाणवले. हवामान बदलामुळे उष्णतेच्या लाटा पूर्वीपेक्षा अधिक तीव्रतेने आणि वारंवार येत आहेत. 2022 च्या एका अभ्यासानुसार, या शतकात उष्णतेच्या लाटांची शक्यता 10 पटीने वाढू शकते.
