मुंबई : बॉलीवूडचा ‘ही-मॅन’ म्हणून ओळखले जाणारे ज्येष्ठ अभिनेते धर्मेंद्र गेल्या काही दिवसांपासून मुंबईतील ब्रीच कँडी रुग्णालयात दाखल आहेत. सोमवार, 10 नोव्हेंबर रोजी त्यांची प्रकृती खालावत असल्याची माहिती समोर आली. धर्मेंद्र यांना वेंटिलेटरवर ठेवण्यात आले असून तब्येत नाजूक असल्याचे सांगितले जात होते. दरम्यान, सायंकाळी त्यांची पत्नी हेमा मालिनी यांनी रुग्णालयाकडे धाव घेतली. त्या पाठोपाठ त्यांची मुलं सनी देओल, बॉबी देओल, सून तान्या देओल, त्यांची नातवंड हेदेखील रुग्णालयाच्या दिशेने जात असल्याचे पाहायला मिळाले. संध्याकाळी ही सर्व धावपळ सुरू असतानाच रात्री उशीर धर्मेंद्र यांच्या प्रकृतीबाबत महत्त्वाची अपडेट समोर आली. सनी देओल टीमच्या वतीने धर्मेंद्र यांची प्रकृती स्थिर असल्याचे सांगण्यात आले.
धर्मेंद्र हे 89 वर्षांचे असून त्यांना श्वास घेण्यास त्रास होत असल्याची तक्रार आहे. त्याच्या मृत्यूच्या बातम्या येत असताना, त्याच्या कुटुंबाने पुष्टी केली की तो वैद्यकीय देखरेखीखाली आहे आणि त्याची प्रकृती स्थिर आहे. त्यांनी मीडिया आणि चाहत्यांना खोट्या अफवा पसरवू नयेत, असे आवाहन केले. चाहत्यांना त्याच्या प्रकृतीत सुधारणा होण्यासाठी प्रार्थना करण्याचे आवाहन केले. सनीच्या टीमने असेही स्पष्ट केले आहे की, धर्मेंद्रच्या प्रकृतीबद्दल अपडेट्स उपलब्ध झाल्यावर शेअर केले जातील. संपूर्ण समाज, मीडिया आणि चाहते या दिग्गज अभिनेत्याच्या प्रकृतीत सुधारणा व्हावी, अशी इच्छा व्यक्त करतात.
दरम्यान, काल अभिनेता सलमान खान, शाहरूख खान, गोविंदा यांनीही रुग्णालयात दाखल होत धर्मेंद्र यांच्या प्रकृतीची चौकशी केली. तर अभिनेत्री अमिषा पटेलदेखील त्यांच्या भेटीसाठी आल्याचे पाहायला मिळाले. पोलिसांनी त्यांच्या घराला वेढा घातल्याचा एक व्हिडिओ इंटरनेटवर व्हायरल झाला आहे. एएनआय वृत्तसंस्थेच्या व्हिडिओनुसार, पोलिसांनी या दिग्गज स्टारच्या घराला वेढा घातला आहे. व्हिडिओमध्ये, मीडिया प्रतिनिधी आणि चाहत्यांना त्यांच्या गेटपासून सुरक्षित अंतरावर ठेवण्यासाठी सुरक्षारक्षक बॅरिकेड्स उभारताना दिसत आहेत. व्हिडिओच्या कॅप्शनमध्ये लिहिले आहे, “अभिनेता धर्मेंद्र रुग्णालयात दाखल असल्याने त्यांच्या निवासस्थानाबाहेर पोलीस बॅरिकेड्स लावण्यात आले आहेत.”
