पंतप्रधान नरेंद्र मोदी यांच्या हस्ते गुरुवारी सायंकाळी मेट्रो २ अ आणि मेट्रो ७ च्या विस्तारित मार्गिकांचे लोकार्पण होणार आहे. अंधेरी पूर्व येथील मेट्रो ७ वरील गुंदवली स्थानकावर हा कार्यक्रम होणार आहे. हे स्थानक मेट्रो १ च्या पश्चिम द्रुतगती मार्ग स्थानकाच्या जवळ आहे. यामुळेच सुरक्षेच्या कारणास्तव पंतप्रधान नरेंद्र मोदी यांच्या मुंबई दौऱ्यावेळी घाटकोपर – वर्सोवा ही मेट्रो १ सेवा बंद ठेवली जाणार आहे.
मेट्रो १ प्रशासनाने जारी केलेल्या सूचनेनुसार, ‘गुरुवार, १९ जानेवारीला सायंकाळी ५.४५ ते ७.३० दरम्यान मेट्रो सेवा प्रशासकीय कारणाने बंद ठेवली जाणार आहे. प्रवाशांनी त्यानुसार स्वत:च्या प्रवासाचे नियोजन करावे. तसदीबद्दल क्षमस्व’, असे या प्रसिद्धीपत्रकात नमूद करण्यात आले आहे.
मेट्रो १ वरून दररोज सरासरी तीन लाख प्रवासी ये-जा करतात. सायंकाळी वर्सोवा, अंधेरी, साकीनाका, असल्फा या भागातून लाखो नोकरदार मेट्रोचा वापर करतात. सेवा बंद राहणार असल्याने या सर्वांची गैरसोय होणार आहे. यामुळे मोठ्या प्रमाणात गोंधळ उडण्याची शक्यता व्यक्त होत आहे. यामुळेच ‘सुरक्षेच्या कारणास्तव मेट्रो सेवा पूर्ण बंद करण्याऐवजी पश्चिम द्रुतगती मार्ग स्थानकावर थांबवू नये. केवळ ते एक स्थानक बंद ठेवावे’, अशी मुंबईकर प्रवाशांची मागणी आहे.
