मुंबई: मुंबईत कोरोना लसीकरण मोहिम सलग दुसऱ्या दिवशी ठप्प आहे. पुरेशा लस साठ्याअभावी आज मुंबईतील शासकीय आणि महानगरपालिका केंद्रांवर लसीकरण बंद राहणार असल्याची माहिती मुंबई महापालिका प्रशासनाच्या वतीने देण्यात आली आहे. गेल्या काही दिवसांपासून पुरेशा प्रमाणात लसपुरवठा होत नसल्याने लसीकरणात सातत्याने अडथळे येत असल्याचं पाहायला मिळत आहे.
मुंबईकरांनो, आम्ही सूचित करू इच्छितो की उद्या (२२ जुलै २०२१) बृहन्मुंबई महानगरपालिका व शासकीय लसीकरण केंद्रांमध्ये लसीकरण केले जाणार नाही आज रात्री उशिरापर्यंत लससाठा प्राप्त होणार असून त्याचे वितरण लसीकरण केंद्राना उद्या केले जाणार आहे. लसीकरणाविषयी पुढील सूचना आम्ही देत राहू — माझी Mumbai, आपली BMC (@mybmc) July 21, 2021
मुंबई महापालिकेला कोविशिल्डचे ५० हजार तर कोवॅक्सिनचे ११ हजार २०० असे एकूण ६१ हजार २०० डोस मिळणार आहेत. हा लससाठा उपलब्ध झाल्यानंतर त्याचे वितरण करण्यात येणार आहे. त्यामुळे आज मुंबईत लसीकरण होणार नसल्याची माहिती देण्यात आली आहे.
दरम्यान, अनेक तास थांबूनही लस मिळत नसल्याने नागरिकांची कोंडीही झाली आहे. काहींना दुसऱ्या डोसची मुदत संपून लस मिळत नसल्याच्या तक्रारीही पुढे आल्या आहेत.
