डोंबिवली: सध्या सोशल मीडियावर एक भन्नाट बॅनर जोरदार व्हायरल होत आहे, ज्यामध्ये रस्त्यांच्या दुरवस्थेवर संतप्त नागरिकांनी लोकप्रतिनिधींना उपरोधिक आणि धाडसी शब्दांत सवाल केला आहे. हा बॅनर पाहिल्यानंतर कोणालाही हसू आवरणार नाही, पण त्यामागचा संतापही स्पष्ट दिसतो.
बॅनरवर ठसठशीत मजकूर:
‘खासदार, आमदार, स्थानिक नगरसेवक, आणि कल्याण डोंबिवली महानागडी पालिका एवठा उत्तम दर्जेदार रस्ता दिल्याबद्दल आभार’ असं लिहून सुरूवात झालेल्या या बॅनरमध्ये, ‘हात लावेल तो नामर्द’ अशी चेतावणी दिली गेली आहे. नागरिकांचा रोष इतका वाढला आहे की त्यांनी आपल्या व्यथा थेट रस्त्यांवर बॅनरद्वारे मांडल्या. बॅनरवरील मजकूर अतिशय उपरोधिक आणि जळजळीत आहे. ‘खासदार, आमदार, नगरसेवक आणि महापालिका प्रशासनाचे आभार… एवढा दर्जेदार रस्ता दिल्याबद्दल! अशी टीका करत जनतेचाही नामोस्तुतीचा टोन वापरण्यात आला आहे.
सोशल मीडियावर प्रतिक्रियांचा पूर:
हा बॅनर things2doindombivli_ या इंस्टाग्राम पेजवरून शेअर होताच त्यावर प्रतिक्रियांचा पूर आला आहे. अनेकांनी याचे समर्थन करत लोकप्रतिनिधींवर टीका केली. ‘स्वतःचा बंगला केला पण आमच्यासाठी एक सरळ रस्ता नाही?’ अशी भावना नेटकऱ्यांनी मांडली. तर काहींनी याला ‘सर्वसामान्यांचा आवाज’ ठरवत अशा आंदोलनांची गरज असल्याचं म्हटलं.
स्थानिक प्रशासनाची कसोटी:
या उपहासात्मक आंदोलनामुळे कल्याण-डोंबिवली महापालिकेसह स्थानिक आमदार, खासदार आणि नगरसेवकांच्या भूमिकेवर प्रश्नचिन्ह निर्माण झालं आहे. बॅनरचा मजकूर जितका विनोदी, तितकाच गंभीरही आहे. नागरिक फक्त प्रश्न विचारत नाहीत, तर आता थेट कृतीच्या मागणीवर गेले आहेत.
