मुंबईच्या वांद्रे-वरळी सी लिंकवर घडलेली एक थरारक घटना सध्या सर्वत्र चर्चेत आहे. मध्यरात्रीच्या सुमारास या महत्त्वाच्या आणि वर्दळीच्या मार्गावरून भरधाव वेगात धावणारी आलिशान लँबॉर्गिनी उरुस कार अचानक सोशल मीडियावर व्हायरल झाली आणि त्यानंतर पोलीस यंत्रणाही तातडीने अॅक्शन मोडवर आली. केवळ प्रसिद्धीसाठी करण्यात आलेली ही धोकादायक स्टंटबाजी अखेर चालकासाठी महागात पडली असून, पोलिसांनी कोट्यवधी रुपयांची कार जप्त करत त्याच्यावर गुन्हा दाखल केला आहे.
व्हायरल झालेल्या इंस्टाग्राम व्हिडीओमध्ये पिवळ्या रंगाची लँबॉर्गिनी सी लिंकवर इतर वाहनांना बिनधास्तपणे ओव्हरटेक करताना आणि वेगमर्यादा धुडकावताना स्पष्ट दिसत होती. या मार्गावर ताशी 80 किलोमीटर वेगमर्यादा असतानाही कार त्यापेक्षा कितीतरी अधिक वेगात धावत होती. काही सेकंदांचा हा व्हिडीओ पाहूनही संभाव्य अपघाताची भीती अनेकांच्या मनात निर्माण झाली होती.
व्हिडीओ व्हायरल होताच मुंबई पोलिसांनी तात्काळ तपास सुरू केला. सीसीटीव्ही फुटेज, सोशल मीडिया अकाउंट्स आणि वाहन नोंदणीच्या आधारे तपास करत पोलिसांनी काही तासांतच चालकाचा शोध लावला. फैज अदनवाला (वय 36), खार पश्चिम येथे राहणारा आणि व्यवसायाने कार एजेंट असलेला तरुण लँबॉर्गिनी चालवत असल्याचे निष्पन्न झाले. प्राथमिक चौकशीत त्याने केवळ व्हिडीओ शूट करण्यासाठीच कार वेगाने चालवल्याची कबुली दिली आहे.
तपासात आणखी एक धक्कादायक बाब समोर आली. ही आलिशान लँबॉर्गिनी ‘सुपर वेल कॉमट्रेड प्रायव्हेट लिमिटेड’ या कंपनीच्या नावावर नोंदणीकृत असून, अहमदाबाद येथील नीरव पटेल हे तिचे मालक आहेत. काही काळासाठी ही कार वापरण्यासाठी फैज अदनवाला याला देण्यात आली होती. हरियाणा नोंदणी क्रमांक (HR 70 F 1945) असलेली ही कार अखेर पोलिसांनी ताब्यात घेतली.
#Mumbai ?⚠️ Lamborghini’s Top Speed #251kmph on Mumbai Sea Link…@DriveSmart_IN @dabir @InfraEye @sss3amitg
pic.twitter.com/XUEyKB7U9C — Dave (Road Safety: City & Highways) (@motordave2) December 12, 2025
वांद्रे-वरळी सी लिंकसारख्या अत्यंत संवेदनशील आणि वर्दळीच्या मार्गावर अशा प्रकारची स्टंटबाजी म्हणजे गंभीर अपघाताला थेट निमंत्रण असल्याचे पोलिसांनी स्पष्ट केले आहे. सोशल मीडियावर व्ह्यूज आणि लाईक्ससाठी वाहतूक नियम मोडणाऱ्यांवर यापुढे कोणतीही मवाळ भूमिका घेतली जाणार नाही, असा स्पष्ट इशाराही देण्यात आला आहे.
सार्वजनिक रस्त्यावर निष्काळजीपणे आणि जीवाला धोका निर्माण होईल अशा पद्धतीने वाहन चालवल्याप्रकरणी चालकाविरोधात संबंधित कलमांखाली गुन्हा दाखल करण्यात आला असून, या प्रकरणाचा पुढील तपास सुरू आहे. काही सेकंदांच्या व्हायरल व्हिडीओसाठी केलेली ही बेफिकीर कृती आता गंभीर कायदेशीर अडचणींमध्ये अडकली असून, ही घटना इतर वाहनचालकांसाठीही एक ठळक इशारा ठरत आहे.
