वॉशिंग्टन: एक्स (X) या एलॉन मस्क यांच्या कंपनीने XChat नावाचे नवीन स्टँडअलोन मेसेजिंग ॲप लाँच केले आहे. सध्या हे ॲप फक्त iOS वापरकर्त्यांसाठी उपलब्ध करण्यात आले आहे. या ॲपच्या माध्यमातून वापरकर्ते त्यांच्या X कॉन्टॅक्ट्ससोबत चॅट, कॉलिंग आणि फाइल शेअरिंग सहज करू शकतात. या लाँचमुळे मस्क यांच्या ‘ऑल-इन-वन ॲप’च्या संकल्पनेत आता थोडा बदल दिसून येत आहे.
XChat मध्ये वापरकर्त्यांना आधुनिक आणि प्रगत फीचर्सचा अनुभव मिळतो. यामध्ये ऑडिओ आणि व्हिडिओ कॉलिंग, टेक्स्ट मेसेजिंग, ग्रुप चॅट आणि फाइल शेअरिंग यांचा समावेश आहे. याशिवाय प्रायव्हसी लक्षात घेऊन डिसअपीयरिंग मेसेज, सर्वांसाठी मेसेज एडिट आणि डिलीट करण्याची सुविधा तसेच स्क्रीनशॉट ब्लॉक करण्याचा पर्यायही देण्यात आला आहे. कंपनीच्या दाव्यानुसार, या ॲपमध्ये कोणतीही ट्रॅकिंग किंवा जाहिराती नाहीत. तसेच, एंड-टू-एंड एन्क्रिप्शन आणि पिन सिक्युरिटीमुळे वापरकर्त्यांचा डेटा अधिक सुरक्षित राहतो. त्यामुळे हे ॲप थेट WhatsApp आणि Facebook Messenger यांना स्पर्धा देण्याच्या तयारीत असल्याचे स्पष्ट होते.
सध्या XChat हे ॲप केवळ iOS वापरकर्त्यांसाठी उपलब्ध आहे. मात्र, लवकरच ते इतर प्लॅटफॉर्मवरही उपलब्ध होण्याची शक्यता आहे. कंपनीचे डिझायनर बेन्जी टेलर यांनी या ॲपमध्ये आगामी काळात आणखी अपडेट्स जोडले जाणार असल्याचे संकेत दिले आहेत.
यापूर्वी एलन मस्क यांनी X ला एक ‘एव्हरीथिंग ॲप’ बनवण्याचा विचार मांडला होता, ज्यामध्ये पेमेंट, शॉपिंग आणि मेसेजिंगसारख्या सर्व सेवा एकाच ठिकाणी उपलब्ध होतील. मात्र आता कंपनीचा दृष्टिकोन बदलताना दिसत आहे. X वेगवेगळ्या ॲप्सद्वारे त्यांची सेवा विस्तारण्यावर भर देत आहे.
मीडिया रिपोर्ट्सनुसार, कंपनी स्वतंत्र पेमेंट सिस्टमवरही काम करत आहे, जी अद्याप सर्वसामान्यांसाठी उपलब्ध केलेली नाही. आगामी काळात XChat मध्ये आणखी नवीन फीचर्स जोडले जाण्याची शक्यता आहे, ज्यामुळे कंपनी आपले ॲप इकोसिस्टम अधिक मजबूत करण्याचा प्रयत्न करत आहे. XChat च्या लाँचमुळे मेसेजिंग ॲप्समधील स्पर्धा अधिक तीव्र होणार असून, भविष्यात हे ॲप WhatsApp सारख्या मोठ्या प्लॅटफॉर्मला कितपत टक्कर देते, हे पाहणे उत्सुकतेचे ठरणार आहे.
