राजकारणात वेगाने घडामोडी घडत आहेत. दरम्यान सध्या सुरु असलेल्या पावसाळी अधिवेशनात सर्वच नेते वक्तव्य करीत आहेत. त्यातच समाजवादी पक्षाचे आमदार अबू आझमी यांनी यांनी अतिशय खळबळजनक असं वक्तव्य केलं आहे. आम्हाला देशातून बाहेर काढलं तरी चालेल पण सच्चा मुसलमान कधीही वंदे मातरम् म्हणणार नाही, असं वक्तव्य समाजवादी पक्षाचे आमदार अबू आझमी यांनी केलं असून आझमी यांच्या विधानाने मोठा वाद निर्माण होण्याची शक्यता आहे.
मद्रास हायकोर्टाने तामिळनाडूतील सर्व शाळा, कॉलेज आणि सरकारी कार्यालयांमध्ये आठवड्यातून किमान एकदा वंदे मातरम् म्हणण्याची सक्ती केली आहे. या पार्श्वभूमीवर आझमी यांची प्रतिक्रिया पत्रकारांनी जाणून घेतली असता त्यांनी विरोधी भूमिका घेतली. ‘वंदे मातरम्’चा मी सन्मान करतो मात्र माझा धर्म मला वंदे मातरम् म्हणण्याची परवानगी देत नाही. त्यामुळे मी वंदे मातरम् म्हणणार नाही. माझ्यावर कारवाई झाली, मला जेलमध्ये टाकलं वा देशाबाहेर काढलं तरी मी यावर ठाम असेन, असे आझमी म्हणाले.
दरम्यान, शिवसेना नेते व परिवहन मंत्री दिवाकर रावते यांनी ‘वंदे मातरम्’चा सन्मान व्हायलाच हवा, असे सांगताना हे गीत ज्या कुणाला म्हणायचे नाही त्यांनी खुशाल देश सोडून जावे, असा टोला लगावला. मद्रास हायकोर्टाने दिलेल्या आदेशांना आधार मानून महाराष्ट्रातही वंदे मातरम् सक्ती करण्यात यावी, अशी विनंती मुख्यमंत्र्यांना भेटून करणार असल्याचे ते म्हणाले. दुसरीकडे भाजप आमदार राज पुरोहित यांनीही शाळा-कॉलेज, सरकारी कार्यालयांमध्ये वंदे मातरम् सक्ती करण्याचा निर्णय घ्यावा, अशी मागणी आपण मुख्यमंत्र्यांकडे करणार असल्याचे सांगितले.
तर,एमआयएमचे आमदार वारीस पठाण यांनीही आझमी यांच्या सुरात सूर मिसळला. माझ्या मानेवर सुरी ठेवली वा माझ्यावर गोळी झाडली तरी मी वंदे मातरम् म्हणणार नाही, असे पठाण म्हणाले.
