वलसाड: पहाटेची ती शांत वेळ, घराकडे परतण्याची ओढ आणि सुखाचा प्रवास… पण नियतीच्या मनात काही वेगळंच होतं. गुजरातच्या वलसाड जिल्ह्यातील कपराडा परिसरात एका भीषण रस्ते अपघाताने होत्याचं नव्हतं केलं आहे. कुंभघाटाजवळ कार आणि ट्रक यांच्यात झालेल्या अंगावर शहारे आणणाऱ्या धडकेत एकाच कुटुंबातील सातजणांची प्राणज्योत जागीच विझली, तर एक जण मृत्यूशी झुंज देत आहे.
नियतीचा क्रूर घाला
मिळालेल्या माहितीनुसार, अंबावन परिसरातील हे कुटुंब कापराडाहून नानापोडाच्या दिशेने प्रवास करत होते. पहाटेच्या सुमारास कुंभघाटाच्या नागमोडी वळणावर समोरून येणाऱ्या भरधाव ट्रकने त्यांच्या कारला जोरदार धडक दिली. ही धडक इतकी भीषण होती की, लोखंडी पत्र्याचा जणू चक्काचूर झाला. गाडीतील प्रवाशांना सावरण्याची संधीही मिळाली नाही. ‘काळाचा घाला’ म्हणतात तो यालाच. ज्या रस्त्यावरून हे कुटुंब भविष्याची स्वप्ने घेऊन चालले होते, त्याच रस्त्यावर त्यांच्या आयुष्याचा शेवट झाला.
एकाच कुटुंबावर दुःखाचा डोंगर
या अपघातातील सर्वात हृदयद्रावक बाब म्हणजे, मृत्युमुखी पडलेले सर्व सातजण एकाच कुटुंबातील सदस्य होते. एका क्षणात संपूर्ण हसतं-खेळतं कुटुंब उद्ध्वस्त झाल्याने अंबावन परिसरात शोककळा पसरली आहे. या अपघातात एक व्यक्ती गंभीर जखमी झाली असून, त्यांच्यावर जवळच्या रुग्णालयात अतिदक्षता विभागात उपचार सुरू आहेत. त्यांची प्रकृती चिंताजनक असल्याचे डॉक्टरांकडून सांगण्यात येत आहे.
#WATCH | Valasad, Gujarat | Kaprada Tehsildar says, "7 people died following a collision between a truck and a car…Further investigation is underway…" pic.twitter.com/1Y6fCYucDj — ANI (@ANI) February 20, 2026
घटनास्थळी रक्ताचा सडा आणि आक्रोश
अपघाताची भीषणता पाहून प्रत्यक्षदर्शींच्याही काळजाचा ठोका चुकला. घटनेची माहिती मिळताच गुजरात पोलिसांनी तातडीने धाव घेत बचावकार्य सुरू केले. अपघात इतका भयानक होता की, कारमधील मृतदेह बाहेर काढण्यासाठी पोलिसांना मोठी कसरत करावी लागली. मृतदेह शवविच्छेदनासाठी पाठवण्यात आले असून, पोलिसांनी घटनेचा पंचनामा केला आहे. अपघातामुळे कुंभघाट परिसरात काही काळ मोठी वाहतूक कोंडी झाली होती.
रस्ते सुरक्षेचा प्रश्न पुन्हा ऐरणीवर
हा अपघात नेमका कशामुळे झाला? ट्रक चालकाचे नियंत्रण सुटले की अतिवेग कारणीभूत ठरला? या प्रश्नांचा शोध आता पोलीस घेत आहेत. मात्र, या भीषण घटनेने महामार्गावरील सुरक्षेचा प्रश्न पुन्हा एकदा ऐरणीवर आणला आहे. ‘सावधानता हटी, दुर्घटना घटी’ याचा प्रत्यय देणारी ही घटना असून, एका निष्पाप कुटुंबाचा अंत झाल्याने संपूर्ण गुजरातमध्ये हळहळ व्यक्त केली जात आहे.
