वॉशिंग्टन: पश्चिम आशियातील वाढत्या तणावाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी इराणच्या लष्करी क्षमतेबाबत मोठा दावा केला आहे. त्यांनी म्हटले की, अमेरिकेच्या कारवाईनंतर इराणी लष्कर जवळपास निष्क्रिय झाले असून त्यांच्या नौदल आणि वायुसेनेला मोठा फटका बसला आहे. अमेरिकेने इराणच्या 44 नौदल जहाजांचा तसेच वायुसेनेतील सर्व विमानांचा नाश केल्याचा दावा ट्रम्प यांनी केला.
ट्रम्प यांनी एका निवेदनात सांगितले की, अमेरिकेने इराणच्या बहुतेक क्षेपणास्त्र क्षमतेलाही लक्ष्य केले आहे. त्यांच्या मते, इराणच्या क्षेपणास्त्र निर्मिती केंद्रांवरही जोरदार हल्ले करण्यात आले आहेत. त्यामुळे सध्या इराणकडून क्षेपणास्त्र प्रक्षेपणाची क्षमता मोठ्या प्रमाणात कमी झाली आहे. तसेच त्यांच्या ड्रोन तंत्रज्ञानालाही गंभीर धक्का बसल्याचे त्यांनी नमूद केले.
इराणच्या लष्करी स्थितीबाबत बोलताना ट्रम्प म्हणाले की, सध्या इराणची लष्करी ताकद जवळपास अस्तित्वात नसल्यासारखी झाली आहे. आवश्यक वाटल्यास अमेरिका इराणच्या सैन्यावर आणखी मोठी कारवाई करू शकते, असेही त्यांनी सूचित केले. मात्र या संदर्भात अंतिम निर्णय अद्याप घेतलेला नसल्याचे त्यांनी स्पष्ट केले.
रशिया आणि इराणच्या संबंधांबाबत बोलताना डोनाल्ड ट्रम्प यांनी मॉस्कोकडून तेहरानला थेट मदत मिळत असल्याच्या शक्यतेला फारसे महत्त्व दिले नाही. त्यांनी सांगितले की, रशिया इराणच्या पाठीशी उभा आहे असे कोणतेही ठोस संकेत अमेरिकेला मिळालेले नाहीत.
जर रशिया प्रत्यक्षात इराणला मदत करत असेल, तर ते त्यांच्या दृष्टीने चुकीचे पाऊल ठरेल, असा सूचक इशाराही त्यांनी दिला. सध्याच्या घडीला इराणची लष्करी आणि धोरणात्मक स्थिती कमकुवत झाल्याचा दावा करत ट्रम्प यांनी या संघर्षात रशियाची भूमिका मर्यादित असल्याचेही सूचित केले.
ऊर्जा बाजाराविषयी बोलताना ट्रम्प यांनी तेलाच्या किमतींवर नियंत्रण ठेवण्यासाठी अमेरिका आवश्यक पावले उचलू शकते, असे संकेत दिले. त्यांच्या मते अमेरिकेकडे तेलाचा प्रचंड साठा उपलब्ध आहे. देशात तसेच समुद्रातील साठ्यांमुळे अमेरिकेकडे ऊर्जा संसाधनांची कमतरता नसल्याचे त्यांनी सांगितले.
