परीक्षा परिषदेमार्फत आयोजित करण्यात आलेल्या परीक्षेदरम्यान पेपर फुटीचा प्रकार समोर आल्याने संपूर्ण परीक्षा प्रक्रिया पुढे ढकलण्यात आली आहे. या प्रकरणाची गंभीर दखल घेत प्रशासनाकडून चौकशी सुरू करण्यात आली असून दोषींवर कठोर कारवाई केली जाणार असल्याचे स्पष्ट करण्यात आले आहे.
ही घटना ठाणे आणि भिवंडी परिसरात प्रश्नपत्रिका लीक झाल्याच्या माहितीमुळे उघडकीस आली. या संपूर्ण प्रकरणात आतापर्यंत तिघांवर गुन्हा दाखल करण्यात आला असून पोलीस पुढील तपास करत आहेत. मिळालेल्या माहितीनुसार, एकूण 37 ठिकाणी परीक्षा होणार होती, 1728 परीक्षा केंद्रे निश्चित करण्यात आली होती, आणि सुमारे 6,01,125 उमेदवार या परीक्षेला बसणार होते. मात्र पेपर फुटीच्या घटनेनंतर परीक्षा स्थगित करण्याचा निर्णय घेण्यात आला.
अधिकाऱ्यांनी स्पष्ट केले आहे की, ज्या उमेदवारांनी आधीच नोंदणी केली आहे त्यांना पुन्हा नोंदणी करण्याची गरज नाही. तसेच पुनर्नोंदणी शुल्कही आकारले जाणार नाही. उमेदवारांचा या प्रकारात कोणताही दोष नसल्याने त्यांच्यावर कोणताही अतिरिक्त आर्थिक भार टाकला जाणार नाही. परीक्षा पुन्हा कधी घेतली जाणार याबाबत अद्याप अंतिम तारीख जाहीर करण्यात आलेली नाही. परंतु लवकरच नव्या वेळापत्रकाचे नियोजन करून उमेदवारांना माहिती देण्यात येईल, असे प्रशासनाने सांगितले आहे.
दरम्यान, परीक्षा परिषदेकडून सांगण्यात आले आहे की अशा प्रकारची परीक्षा आयोजित करण्यासाठी साधारणपणे तीन आठवड्यांचा कालावधी लागतो. त्यामुळे पुढील तारखा निश्चित करताना सर्व बाबींचा विचार करूनच निर्णय घेतला जाईल.
