रेल्वे मार्गांवरील रुळांची दुरुस्ती आणि तांत्रिक कामांसाठी रविवारी 9 एप्रिल रोजी हार्बर रेल्वे आणि पश्चिम रेल्वेवर मेगाब्लॉक घेण्यात येणार आहे. हार्बर रेल्वेवर सकाळी 11.10 ते सायंकाळी 4.10 वाजेपर्यंत मेगाब्लॉक असणार आहे. तर, पश्चिम रेल्वे मार्गावर सकाळी 10.00 ते दुपारी 3.00 वाजेपर्यंतर मेगाब्लॉक असणार आहे.
हार्बर रेल्वेमार्गावर मेगाब्लॉक असल्यामुळे सीएसएमटी येथून पनवेल/बेलापूरपकडे जाणाऱ्या डाउन हार्बर मार्गावरील सेवा रद्द राहतील. तर, पनवेल येथून सीएसएमटीकरीता सुटणाऱ्या अप हार्बर मार्गावरील सेवा रद्द राहतील. या मेगाब्लॉक दरम्यान, सीएसएमटी ते कुर्ला स्थानकादरम्यान लोकल धावणार आहेत. तसेच, ठाणे-वाशी/नेरुळ स्थानकादरम्यान ट्रान्सहार्बर मार्ग उपलब्ध असेल.
अप-डाउन जलद मार्गावरील लोकल सेवा सांताक्रूझ ते गोरेगाव स्थानकादरम्यान धीम्या मार्गावर वळविल्या जातील. तसेच, बोरिवलीहून सुटणाऱ्या काही लोकल रेल्वेगाड्या गोरेगाव स्थानकापर्यंत धावतील.
