महाराष्ट्र राज्य रस्ते विकास महामंडळ (एमएसआरडीसी) आणि ‘जय महाराष्ट्र वृत्तवाहिनी’ने आयोजित केलेला “गाथा विदर्भाची: विकासाची, समृद्धीची” या विशेष कार्यक्रमास प्रमुख पाहुणे म्हणून अभिनेता भारत गणेशपुरे उपस्थित होते. त्यांनी आपल्या कला क्षेत्रातील अनुभवातून विदर्भातील विकासातील बदलांचा उल्लेख केला.
भारत गणेशपुरे यांनी आपले बालपण आणि प्रारंभिक काळातील संघर्षांचा दाखला देत, विदर्भातील कला क्षेत्रातील स्थितीवर उजेड टाकला. ते म्हणाले की, “पूर्वी विदर्भात अभिनयासाठी पुरेशा सोयीसुविधा नव्हत्या. बंद पडलेल्या, मोडक्या शाळांच्या इमारतींमध्ये आम्ही तालीम करायचो. मात्र आता परिस्थिती पूर्णपणे बदलली आहे. शासनाने विविध योजना राबवून कलाकारांसाठी आवश्यक असणाऱ्या सोयी-सुविधा उपलब्ध करून दिल्या आहेत.”
गणेशपुरे यांनी सांगितले की, आजकाल शासनाकडून रिहर्सलसाठीही फंड उपलब्ध करून दिले जातात, ज्यामुळे कलाकारांना त्यांच्या कला जोपासण्यासाठी एक उत्तम आधार मिळाला आहे. पूर्वीची आणि आताची परिस्थिती खूप वेगळी आहे. विशेषत: एकांकिका स्पर्धांच्या आयोजनात पारदर्शकता वाढली आहे. पूर्वी अनेकदा या स्पर्धांमध्ये वादविवाद होत असत, परंतु आता शासनाच्या मदतीमुळे वातावरण शांत आणि पारदर्शक झाले आहे. या बदलांनी कलाकारांच्या प्रवासाला नवी दिशा दिली आहे, असे गणेशपुरे यांनी मांडले.
विदर्भाच्या विकासाच्या या कार्यक्रमात भारत गणेशपुरे यांचा अनुभव विशेष ठरला आहे. त्यांनी आपल्या क्षेत्रातील बदलांचा उल्लेख करत, विदर्भातील सांस्कृतिक विकासाची कथा उलगडली. त्यांच्या मते, शासनाच्या योजना आणि उपक्रमांमुळे कलाक्षेत्रात मोठे परिवर्तन झाले आहे, ज्याचा लाभ नवीन पिढीतील कलाकारांना होत आहे. विदर्भात आता केवळ अभिनयच नव्हे तर कला जोपासण्यासाठी आवश्यक असलेल्या सर्व गोष्टी उपलब्ध आहेत.
अशाप्रकारे, “गाथा विदर्भाची: विकासाची, समृद्धीची” हा कार्यक्रम विदर्भाच्या विकासाच्या प्रवासातील महत्त्वाचा टप्पा ठरला आहे.
