खान्देश: मुंबई , कोकण किनारपट्टीसह आता खान्देशात थंडीने आगमन केल्याने वातावरणात गारवा पसरला आहे, आणि याचसोबत खान्देशातील खाद्यसंस्कृतीही रंगतदार झाली आहे. थंडीच्या या दिवसांत भरीत खाण्याचा आनंद काही औरच असतो. खास करून वांग्याच्या भरीताला खान्देशात अनोखी चव असते, ज्यामुळे खवय्यांना या ऋतूत भरीताचा आस्वाद घेण्याचा उत्साह वाढतो.
सध्या बाजारपेठेत भरीताच्या वांग्याला चांगली मागणी असून, सुरुवातीला आवक कमी असल्याने वांग्यांचे दर ८० रुपये ते १०० रुपये किलोपर्यंत पोहोचले आहेत. शेतकऱ्यांकडून वांग्यांची आवक वाढल्यावर दर कमी होण्याची शक्यता आहे.
खान्देशातील भरीत तयार करण्याची खास पद्धत आहे. अशा थंडीच्या दिवसात वांगी चुलीवर किंवा काड्यांवर भाजून घेतात , ज्यामुळे भरीताला एक अनोखा स्वाद मिळतो. मस्त चटपटीत मसाले, चिरलेला कांदा, लसूण, आणि तिखट तेल यामुळे या भरीताचा स्वाद अधिक खुलतो. भरीत फक्त एक पदार्थ नाही, तर खान्देशाच्या पारंपरिक खाद्यसंस्कृतीचे प्रतीक आहे.
त्याचबरोबर, थंडीच्या दिवसांत मस्त गरमागरम भाकरीसोबत भरीत खाण्याचा आनंदच काही निराळा असतो. आणि या लज्जतदार पदार्थाला फक्त खान्देशात नाही तर इतर भागातही पसंती आहे. यामुळेच खान्देशातील भरीत फक्त स्थानिक नव्हे, तर बाहेरील खवय्यांमध्येही प्रसिद्ध होत आहे.
