मुंबई: भारतीय संघाचा स्टार फलंदाज शुभमन गिल पंजाब रणजी संघासाठी खेळणार आहे. रणजी करंडकच्या सहाव्या फेरीत कर्नाटकच्या विरुद्ध असलेल्या सामन्यात गिल पंजाब संघाकडून खेळेल. हा सामना 23 जानेवारीपासून सुरु होणार आहे. हा सामना बंगळुरूच्या चिन्नस्वामी मैदानात होणार आहे.
शुभमन गिलचा कसोटी क्रिकेटमधील फॉर्म भारतासाठी चिंतादायी आहे. ऑस्ट्रेलिया दौऱ्याच्या चौथ्या सामन्यात त्याला संघातून वगळण्यातदेखील आलेलं.
भारतीय संघाच्या ऑस्ट्रेलियातील पराभवानंतर सगळ्या खेळाडूंना डोमेस्टिक क्रिकेट खेळण्याचे आदेश मिळाले होते. त्यानंतर बरेच मुख्य खेळाडू डोमेस्टिक क्रिकेटमध्ये खेळताना दिसू शकतात.
पंजाब संघाचा प्रशिक्षक वासिम जाफर आहे, ज्याच्या नावावर रणजी करंडकामध्ये सर्वाधिक धावा करण्याचा विक्रम आहे. भारतीय संघातील निवडीमुळे अनुभवी खेळाडू अभिषेक शर्मा आणि अर्शदीप सिंग अनुपस्थित राहतील, कारण त्यांची निवड 22 जानेवारीपासून कोलकाता येथे सुरू होणाऱ्या इंग्लंडविरुद्धच्या पाच सामन्यांच्या T20I मालिकेसाठी भारताच्या संघात झाली आहे. गिलने शेवटचा रणजी ट्रॉफी सामना पंजाबकडून 2022 मध्ये अलूर येथे झालेल्या उपांत्यपूर्व फेरीत मध्य प्रदेशविरुद्ध खेळला होता. पंजाबच्या रणजी ट्रॉफी प्लेऑफसाठी पात्र होण्याच्या आशा अत्यंत कमी आहेत; त्यांनी पाच सामन्यांत फक्त एक विजय मिळवला असून सध्या ते गट अ मध्ये पाचव्या स्थानी आहेत.
