शिर्डीच्या पवित्र भूमीत साईबाबांच्या चरणी नतमस्तक होणाऱ्या भाविकांची श्रद्धा केवळ दर्शनापुरती मर्यादित नसून, ती विश्वास, कृतज्ञता आणि समर्पणाची अनुभूती देणारी आहे. बाबांच्या दरबारात येणाऱ्या प्रत्येक भक्ताच्या मनातील शुद्ध भावना बाबांपर्यंत पोहोचतात आणि त्या योग्य वेळी पूर्ण होतात, असा भक्तांचा दृढ विश्वास आहे. अशीच श्रद्धा आणि कृतज्ञतेची एक भावस्पर्शी घटना नुकतीच शिर्डीत घडली असून, तिने साईदरबारातील भक्तीचे तेज अधिक उजळून टाकले आहे.
मध्य प्रदेशातील हरदासपूर येथील साईभक्त तेज बहादूर सिंह यांनी साईबाबांकडे मनोभावे एक इच्छा व्यक्त केली होती. बाबांच्या कृपेने ती मनोकामना पूर्ण झाल्यानंतर त्यांनी आपली कृतज्ञता शब्दांत नव्हे, तर समर्पणातून व्यक्त करण्याचा निर्णय घेतला. त्यासाठी त्यांनी साईबाबांसाठी विशेष तयार केलेला शुद्ध सोन्याचा कलात्मक मुकुट बाबांच्या चरणी अर्पण केला.
हेही वाचा: BMC Election 2026: मुंबईत पवारांची ठाकरे बंधूंना साथ? राज-उद्धवकडे किती जागांची मागणी?
हा मुकुट केवळ दागिन्याचा नमुना नसून, भक्ती आणि कलाकुसरीचा अद्भुत संगम आहे. सुमारे 200 ग्रॅम शुद्ध सोन्यापासून बनवलेल्या या मुकुटावर अत्यंत देखणं आणि पारंपरिक नक्षीकाम करण्यात आले आहे. सध्याच्या सोन्याच्या दरानुसार या मुकुटाची किंमत सुमारे 20 लाख 16 हजार रुपये असल्याची माहिती आहे. हा मुकुट साईबाबांच्या मूर्तीसाठी खास तयार करण्यात आला असून, त्याचे तेज दर्शन घेणाऱ्या प्रत्येक भक्ताचे लक्ष वेधून घेत आहे.
तेज बहादूर सिंह यांनी हा सुवर्ण मुकुट विधीपूर्वक श्री साईबाबा संस्थानकडे सुपूर्द केला. या वेळी संस्थानच्या वतीने त्यांचे स्वागत करत शाल आणि पुष्पगुच्छ देऊन सन्मान केला. साईबाबांवरील त्यांच्या निष्ठा, श्रद्धा आणि कृतज्ञतेबद्दल संस्थानने मनःपूर्वक आभार मानले.
शिर्डीतील साईदरबारात दरवर्षी कोट्यवधी रुपयांचे सोने, चांदी आणि रोख स्वरूपातील दान येत असते. मात्र, यामागे असलेली भावना ही संपत्तीपेक्षा कितीतरी पटींनी मौल्यवान असते. तेज बहादूर सिंह यांच्या या सुवर्ण मुकुटाच्या अर्पणाने साईभक्तांच्या श्रद्धेला नवसंजीवनी मिळाली असून, बाबांच्या कृपेची अनुभूती आजही जिवंत असल्याचा प्रत्यय पुन्हा एकदा भाविकांना आला आहे.
हेही वाचा: Maharashtra Weather : राज्यात धुक्याची चादर! IMD चा मोठा इशारा; पुढील 48 तास…
