छत्रपती संभाजीनगर : येथील विभागीय क्रीडा संकुलाच्या विकासासाठी स्थापन केलेल्या पालकमंत्र्यांच्या अध्यक्षतेखालील समितीच्या बँक खात्यातील 21 कोटी 59 लाख 38 हजार 287 रुपये दोन कंत्राटी कर्मचाऱ्यांनी आपल्या खात्यांत वळते करून हडपल्याचा धक्कादायक प्रकार उघडकीस आला आहे.
आर्थिक गुन्हे शाखेने चौकशीनंतर जवाहरनगर पोलिस ठाण्यात गुन्हा नोंदविल्याची माहिती वरिष्ठ पोलिस निरीक्षक संभाजी पवार यांनी दिली. पोलिसांनी दोन आरोपींना अटक केली आहे.
कसा झाला घोटाळा?
क्षीरसागरने घोटाळा करण्यासाठी क्रीडा उपसंचालकांच्या नाव आणि स्वाक्षरीचा बनावट वापर केला.
बँकेस बनावट मजकुराचे पत्र पाठवून खात्याला स्वतःचा मोबाइल क्रमांक जोडला.
मोबाइल नंबर जोडल्यानंतर नेट बँकिंग सुविधा सुरू करून घेतली आणि मोठ्या प्रमाणावर रक्कम स्वतःच्या खात्यात वळवली.
प्रश्न अनुत्तरित
कंत्राटी कर्मचारी इतकी मोठी रक्कम स्वतःच्या खात्यात वळवत असताना क्रीडा उपसंचालक आणि बँकेतील अधिकारी अनभिज्ञ कसे राहिले?
आयकर विभागाच्या नोटिसा आल्या नसल्याचे कारण काय?
पोलिस तपास सुरू
आर्थिक गुन्हे शाखा आणि जवाहरनगर पोलिस विभाग या प्रकरणाचा सखोल तपास करत आहेत. आरोपींना न्यायालयात हजर केले जाईल आणि घोटाळ्याच्या इतर बाजूंवरही तपास होईल.
छत्रपती संभाजीनगरच्या क्रीडा संकुलातील हा प्रकार प्रशासनाच्या निष्काळजीपणाचे आणखी एक मोठे उदाहरण ठरत आहे.
