भारतीय हवामान विभागाने (IMD) मुंबई महानगर प्रदेशासह ठाणे, नवी मुंबई, पालघर, रायगड आणि कोकणातील अनेक जिल्ह्यांसाठी 4 जुलै रोजी रेड अलर्ट जारी केल्यानंतर विविध स्थानिक प्रशासनांनी विद्यार्थ्यांच्या सुरक्षिततेला प्राधान्य देत शाळांना सुट्टी जाहीर केली आहे. मुसळधार ते अतिमुसळधार पावसाचा अंदाज, जोरदार वारे, सखल भागात पाणी साचण्याची शक्यता आणि वाहतुकीवर होणारा परिणाम लक्षात घेऊन हा निर्णय घेण्यात आला आहे. ठाणे जिल्हाधिकारी कार्यालयाने जारी केलेल्या आदेशानुसार, 4 जुलै 2026(शनिवार) रोजी जिल्ह्यातील सर्व सरकारी, अनुदानित, खासगी तसेच महापालिका क्षेत्रातील शाळा आणि अंगणवाड्या बंद राहतील. प्रशासनाने पालकांना मुलांना घराबाहेर न पाठवण्याचे तसेच अत्यावश्यक कामाशिवाय बाहेर पडणे टाळण्याचे आवाहन केले आहे.
नवी मुंबई महानगरपालिका क्षेत्रातील सर्व प्राथमिक, माध्यमिक आणि उच्च माध्यमिक शाळांनाही सुट्टी जाहीर करण्यात आली आहे. हवामान खात्याने पुढील 24 तासांत अतिवृष्टीचा इशारा दिल्यामुळे विद्यार्थ्यांच्या सुरक्षिततेच्या दृष्टीने हा निर्णय घेण्यात आला. प्रशासनाने सर्व शैक्षणिक संस्थांना आवश्यक ती खबरदारी घेण्याच्या सूचना दिल्या आहेत. भिवंडी-निजामपूर महानगरपालिका हद्दीतील राज्य मंडळ, CBSE, ICSE, IGCSE तसेच इतर सर्व माध्यमांच्या शाळा आणि महाविद्यालयांनाही 4 जुलै रोजी सुट्टी जाहीर करण्यात आली आहे. शिक्षक, विद्यार्थी आणि शिक्षकेतर कर्मचाऱ्यांच्या सुरक्षिततेला प्राधान्य देत हा निर्णय लागू करण्यात आला असून संबंधित संस्थांना आदेशाचे काटेकोर पालन करण्यास सांगण्यात आले आहे.
पालघर जिल्ह्यातदेखील मुसळधार पावसाचा रेड अलर्ट लक्षात घेऊन जिल्हा प्रशासनाने शाळा, महाविद्यालये आणि अंगणवाड्यांना सुट्टी जाहीर केली आहे. जिल्हाधिकाऱ्यांनी नागरिकांना नदी, नाले आणि समुद्रकिनाऱ्याजवळ जाणे टाळण्याचा तसेच स्थानिक प्रशासनाच्या सूचनांचे पालन करण्याचा सल्ला दिला आहे. दरम्यान, हवामान विभागाच्या अंदाजानुसार 4 ते 6 जुलै या कालावधीत मुंबई महानगर प्रदेश, ठाणे, पालघर, रायगड तसेच कोकण किनारपट्टीवर मुसळधार ते अतिमुसळधार पावसाची शक्यता आहे. काही ठिकाणी ताशी 40 ते 50 किलोमीटर वेगाने वारे वाहण्याची शक्यता असून सखल भागांमध्ये पाणी साचणे, झाडे कोसळणे आणि वाहतुकीवर परिणाम होऊ शकतो.
प्रशासनाने आपत्ती व्यवस्थापन यंत्रणा सज्ज ठेवली असून नागरिकांना अफवांवर विश्वास न ठेवता केवळ अधिकृत सूचना आणि हवामान विभागाच्या अद्ययावत माहितीकडे लक्ष देण्याचे आवाहन केले आहे. पालकांनी आपल्या मुलांच्या शाळेकडून मिळणाऱ्या संदेशांची खात्री करूनच पुढील नियोजन करावे, असेही प्रशासनाने स्पष्ट केले आहे.
