पुणे: पुणे-नाशिक महामार्गावर बुधवारी सकाळी झालेल्या भीषण अपघातामुळे काही काळ वाहतुकीचा पूर्णपणे खोळंबा झाला. खेड तालुक्यातील वाकी गावाजवळ हा अपघात घडला असून, नाशिकच्या दिशेने येणाऱ्या भरधाव कंटेनरने नियंत्रण गमावल्याने डिव्हायडर तोडून तो थेट विरुद्ध दिशेच्या मार्गावर गेला. यावेळी पुण्याकडे येत असलेल्या ट्रकला कंटेनरची जोरदार धडक बसली. या धडकेची तीव्रता इतकी मोठी होती की ट्रक रस्त्याच्या कडेला कोसळला, तर त्याखाली एक वेगन-आर कार अडकली. अपघाताचे दृश्य अत्यंत भीषण होते. घटनास्थळी काही काळ नागरिकांमध्ये घबराटीचे वातावरण निर्माण झाले. मात्र, या मोठ्या अपघातात कोणतीही जीवितहानी झाली नसल्याची माहिती समोर आली असून ही मोठी दिलासादायक बाब मानली जात आहे. वाहनांचे मोठे नुकसान झाले असले तरी सर्वजण सुखरूप असल्याचे प्राथमिक माहितीतून स्पष्ट झाले आहे.
सकाळच्या गर्दीच्या वेळी अपघात
ही घटना सकाळी सुमारे 6.15 वाजण्याच्या सुमारास घडली. कार्यालयीन वेळ सुरू होण्यापूर्वीच अपघात झाल्याने पुण्याच्या दिशेने जाणाऱ्या वाहनांच्या लांबच लांब रांगा लागल्या. कंटेनर पुणे लेनमध्ये आल्यामुळे त्या मार्गावरील वाहतूक पूर्णपणे ठप्प झाली. दुसरीकडे, नाशिककडे जाणाऱ्या मार्गावरही वाहनांचा वेग मंदावल्याने वाहतूक विस्कळीत झाली.
वाहतूक सुरळीत करण्यासाठी प्रयत्न सुरू
अपघाताची माहिती मिळताच महामार्ग पोलीस आणि संबंधित यंत्रणा घटनास्थळी दाखल झाली. क्रेनच्या सहाय्याने कंटेनर, ट्रक आणि इतर अपघातग्रस्त वाहने बाजूला करण्याचे काम युद्धपातळीवर सुरू करण्यात आले. वाहतूक शक्य तितक्या लवकर पूर्ववत करण्यासाठी प्रशासनाकडून प्रयत्न सुरू आहेत.
वाहनचालकांना सावधगिरीचे आवाहन
या अपघातानंतर महामार्गावरून प्रवास करणाऱ्या वाहनचालकांना पर्यायी मार्गांचा वापर करण्याचे तसेच घटनास्थळाजवळ सावधगिरीने वाहन चालवण्याचे आवाहन करण्यात आले आहे. सकाळच्या वेळेत वाहतुकीवर मोठा परिणाम झाल्याने प्रवाशांना काही काळ अडचणींचा सामना करावा लागला.
