मुंबई: पीएम किसान सन्मान निधी योजनेच्या 24व्या हप्त्याची शेतकऱ्यांना प्रतीक्षा लागली आहे. या हप्त्याबाबत सध्या महत्त्वाची माहिती समोर आली असून, काही पात्र शेतकऱ्यांच्या खात्यात नेहमीच्या 2 हजार रुपयांऐवजी थेट 4 हजार रुपये जमा होऊ शकतात. मात्र, सर्व लाभार्थ्यांना 4 हजार रुपये मिळणार नसून, ज्या शेतकऱ्यांचा मागील हप्ता काही कारणामुळे रखडला होता आणि तो आता मंजूर होणार आहे, अशा लाभार्थ्यांना दोन्ही हप्त्यांची रक्कम एकत्र मिळण्याची शक्यता आहे.
24व्या हप्त्यासाठी काय आवश्यक?
पीएम किसान योजनेचा लाभ सुरू ठेवण्यासाठी शेतकऱ्यांनी काही महत्त्वाच्या प्रक्रिया पूर्ण केलेल्या असणे गरजेचे आहे. यामध्ये ई-केवायसी, जमिनीची नोंदणी म्हणजेच Land Seeding आणि आधारशी संबंधित बँक खात्याची प्रक्रिया पूर्ण असणे महत्त्वाचे आहे.यापैकी एखादी प्रक्रिया अपूर्ण असल्यास संबंधित शेतकऱ्याचा हप्ता अडकण्याची शक्यता असते. त्यामुळे 24व्या हप्त्याची वाट पाहण्यापूर्वी लाभार्थ्यांनी आपल्या खात्याची स्थिती तपासणे फायदेशीर ठरणार आहे.
कोणाला मिळू शकतात 4 हजार रुपये?
पीएम किसान योजनेंतर्गत प्रत्येक पात्र शेतकऱ्याला एका हप्त्यात 2 हजार रुपये दिले जातात. मात्र, एखाद्या लाभार्थ्याचा मागील हप्ता कागदपत्रे किंवा आवश्यक प्रक्रिया अपूर्ण असल्यामुळे थांबला असेल आणि त्यानंतर संबंधित त्रुटी दूर झाल्या असतील, तर प्रलंबित रक्कम पुढील हप्त्यासोबत मिळू शकते.अशा परिस्थितीत मागील 2 हजार आणि नवीन 2 हजार असे मिळून 4 हजार रुपये खात्यात जमा होण्याची शक्यता आहे. त्यामुळे 4 हजार रुपये ही नवीन नियमित रक्कम नसून, दोन हप्त्यांची एकत्रित रक्कम असू शकते.
हप्ता अडकला आहे का, असे तपासा
शेतकऱ्यांना आपल्या पीएम किसान लाभार्थी स्थितीची ऑनलाइन तपासणी करता येते. यासाठी योजनेच्या अधिकृत पोर्टलवर जाऊन संबंधित स्टेटस तपासता येईल. ई-केवायसी पूर्ण आहे का, Land Seedingची स्थिती काय आहे आणि आधार-बँक लिंकिंगमध्ये काही अडचण आहे का, याची माहिती लाभार्थ्यांना मिळू शकते.त्यामुळे 24व्या हप्त्याची रक्कम खात्यात जमा होण्यापूर्वी या प्रक्रिया पूर्ण आहेत की नाही, हे तपासणे महत्त्वाचे आहे. विशेषतः मागील हप्ता न मिळालेल्या शेतकऱ्यांनी आपल्या लाभार्थी स्टेटसकडे लक्ष देणे गरजेचे आहे.
शेतकऱ्यांनी काय काळजी घ्यावी?
हप्ता मिळवण्यासाठी कोणत्याही अनोळखी व्यक्तीला बँक तपशील, OTP किंवा इतर गोपनीय माहिती देऊ नये. अधिकृत सरकारी पोर्टलवरच लाभार्थीची माहिती तपासावी. हप्ता रखडला असल्यास त्यामागील कारण शोधून आवश्यक प्रक्रिया पूर्ण केल्यास प्रलंबित रक्कम मिळण्याचा मार्ग मोकळा होऊ शकतो.
