कल्याण पूर्वेतील एका खासगी रुग्णालयात उपचाराच्या बिलावरून झालेल्या वादाने हिंसक वळण घेतल्याची धक्कादायक घटना समोर आली आहे. एका रुग्णाने आपल्या साथीदारांच्या मदतीने डॉक्टर आणि रुग्णालयातील कर्मचाऱ्यांवर रॉड व डंडक्यांनी हल्ला केल्याने परिसरात खळबळ उडाली आहे. या संपूर्ण घटनेचे चित्रण रुग्णालयातील सीसीटीव्ही कॅमेऱ्यात कैद झाले असून पोलिसांनी त्याच्या आधारे तपास सुरू केला आहे.
मिळालेल्या माहितीनुसार, संबंधित रुग्ण तापाची तक्रार घेऊन उपचारासाठी रुग्णालयात दाखल झाला होता. डॉक्टरांनी आवश्यक तपासणी करून त्याच्यावर उपचार केले. उपचार पूर्ण झाल्यानंतर रुग्णाला सुमारे दोन हजार रुपयांचे बिल देण्यात आले. मात्र, रुग्णाची परिस्थिती लक्षात घेऊन रुग्णालय प्रशासनाने सवलत देत बिलाची रक्कम जवळपास 1500 रुपयांपर्यंत कमी केली.
तरीही रुग्णाने बिल भरण्यास टाळाटाळ सुरू केली. विविध कारणे सांगत वेळ काढण्याचा प्रयत्न केल्यानंतर त्याने मित्राकडे पैसे असल्याचे सांगितले. त्यानुसार रुग्णालयातील काही कर्मचारी आणि डॉक्टर खाली गेले. मात्र, तेथे आधीपासूनच काही जण रॉड आणि डंडके घेऊन उभे होते.
डॉक्टर आणि कर्मचारी खाली पोहोचताच संबंधित व्यक्तींनी अचानक त्यांच्यावर हल्ला चढवला. या अनपेक्षित हल्ल्यामुळे एकच गोंधळ उडाला. हल्लेखोरांनी डॉक्टर आणि कर्मचाऱ्यांना बेदम मारहाण केली. या घटनेत डॉक्टरांसह काही कर्मचारी जखमी झाल्याची माहिती समोर आली आहे. जखमींवर उपचार करण्यात आले असून त्यांची प्रकृती स्थिर असल्याचे सांगितले जात आहे.
या हल्ल्यामुळे रुग्णालयातील रुग्ण आणि त्यांच्या नातेवाईकांमध्येही भीतीचे वातावरण निर्माण झाले. काही काळासाठी रुग्णालयातील कामकाजावरही परिणाम झाल्याचे समजते. घटनेनंतर रुग्णालय प्रशासनाने तातडीने कोळसेवाडी पोलीस ठाण्यात धाव घेत तक्रार दाखल केली. पोलिसांनी या प्रकरणी गुन्हा नोंदवून सीसीटीव्ही फुटेज ताब्यात घेतले आहे. फुटेजच्या आधारे हल्लेखोरांची ओळख पटवण्याचे आणि त्यांना अटक करण्याचे प्रयत्न सुरू असल्याची माहिती पोलिसांकडून देण्यात आली आहे.
डॉक्टर आणि आरोग्य कर्मचाऱ्यांवर वाढत्या हल्ल्यांच्या घटनांमुळे वैद्यकीय क्षेत्रात चिंता व्यक्त केली जात आहे. रुग्णालये ही उपचार आणि सेवेसाठी असतात. अशा ठिकाणी हिंसक प्रकार घडल्यास डॉक्टर व कर्मचाऱ्यांच्या सुरक्षेचा प्रश्न पुन्हा एकदा ऐरणीवर आला आहे. या प्रकरणातील आरोपींवर कठोर कारवाई करण्याची मागणी वैद्यकीय क्षेत्रातून होत आहे.
