नवीन वर्षातील पहिला सण मकर संक्रांत अवघ्या दोन दिवसांवर येऊन ठेपला आहे. श्री विठ्ठल रूक्मिणी मंदिरामध्ये प्रतिवर्षी प्रमाणे परंपरेनुसार मकरसंक्रांत उत्सव साजरा करण्यात येत आहे. संक्रांतीनिमित्त राज्यभरातून महिला भोगीसाठी मंदिरात दाखल होत असून महिला भाविकांना दर्शन घेण्यास प्रधान्य दिलं जाणार असून, पुरूषांसाठी विशेष नियमावली जाहीर करण्यात आली आहे.
भाविकांच्या सोईच्या दृष्टीने दिनांक 13 जानेवारी रोजी श्री विठ्ठलाकडील काकडा आरती व नित्यपूजा पहाटे 4.30 ते 5.45 या वेळेत होऊन, पदस्पर्श दर्शन पहाटे 06.00 नंतर सुरू करणेत येणार आहे.
दिनांक 14 जानेवारी रोजी नेहमीच्या वेळेमध्ये मकरसंक्रांती निमित्त श्री रूक्मिणी मातेची काकडा आरती व नित्यपूजा झाल्यानंतर श्री रूक्मिणी मातेस अलंकार परिधान केलेनंतर दर्शन सुरू करण्यात येणार आहे.
15 जानेवारी रोजी नेहमीप्रमाणे श्री रूक्मिणी मातेची काकडा आरती व नित्यपूजा नेहमीच्या वेळेत करण्यात येणार असून, दिनांक 14 जानेवारी रोजी मकरसंक्रांती निमित्त जास्तीत जास्त माता व भगिनींना श्री विठ्ठल रूक्मिणी मातेचे दर्शन सुलभ व्हावे, याकरीता पुरूष भाविकांनी शक्यतो मुखदर्शनाचा लाभ घ्यावा, असे आवाहन मंदिरे समितीच्या वतीने करण्यात येत आहे.
