Nitin Gadkari On India Road Network: केंद्रीय रस्ते वाहतूक आणि महामार्ग मंत्री नितीन गडकरी यांनी मंगळवारी एका कार्यक्रमात बोलताना भारतातील रस्त्यांबद्दल मोठं विधान केलं आहे. 'पुढील दोन वर्षांत भारतातील रस्त्यांचे जाळे अमेरिकेपेक्षा चांगले होईल. मला वाटत नाही की रस्ते क्षेत्रात कोणतीही समस्या आहे. या वर्षी आणि पुढच्या वर्षी होणारे बदल इतके महत्त्वाचे असतील की आधी मी म्हणायचो की आपले महामार्ग नेटवर्क अमेरिकेच्या बरोबरीचे असेल, पण आता मी म्हणतो की पुढील दोन वर्षांत आपले महामार्ग नेटवर्क अमेरिकेपेक्षा चांगले होईल,' असा दावा नितीन गडकरी यांनी केला आहे.
इलेक्ट्रिक वाहनांचा अवलंब आणि उत्पादन करण्यात भारत अमेरिकेला मागे टाकेल –
नितीन गडकरी यांनी सांगितले की, पुढील पाच वर्षांत भारत इलेक्ट्रिक वाहनांचा (EV) अवलंब आणि उत्पादन करण्यात अमेरिकेला मागे टाकेल. रस्त्यांच्या नवीन जाळ्यांमुळे दिल्ली, देहरादून, जयपूर आणि बेंगळुरू सारख्या शहरांमधील प्रवासाचा वेळ लक्षणीयरीत्या कमी होईल.
तथापि, टेस्लाच्या भारतात प्रवेशाबद्दल विचारले असता, नितीन गडकरी यांनी सांगितलं की, ही एक खुली बाजारपेठ आहे, जो सक्षम आहे तो येऊ शकतो, उत्पादन करू शकतो आणि किमतींवर स्पर्धा करू शकतो. देशातील वाहतूक उत्पादक किमतीला नाही तर गुणवत्तेला प्राधान्य देतात. तथापि, यावेळी गडकरी यांनी म्हटलं की, ते लॉजिस्टिक्स खर्च एक अंकी कमी करण्यासाठी वचनबद्ध आहेत, ज्यामुळे भारताची जागतिक स्पर्धात्मकता बळकट होईल. सध्या देशाचा लॉजिस्टिक्स खर्च सुमारे 14-16 टक्के आहे.
हेही वाचा – आता रस्त्यावर धावणार ट्रेन! नितीन गडकरींनी नागपूरमध्ये भारतातील पहिल्या रोड ट्रेनला दाखवला हिरवा झेंडा
लिथियम-आयन बॅटरीच्या किमती कमी –
दरम्यान, नितीन गडकरी यांनी यावेळी बोलताना सांगितले की, वाहन स्क्रॅपिंग धोरण लागू केल्याने, वाहनांच्या घटकांच्या किमती 30 टक्क्यांपर्यंत कमी होऊ शकतात, ज्यामुळे वाहनांच्या किमती कमी होतील आणि ग्राहकांना फायदा होईल. शहरे आणि महामार्गांमध्ये चार्जिंग पायाभूत सुविधा सुधारण्यासाठी सरकार अनेक पावले उचलत आहे, ज्यामुळे इलेक्ट्रिक वाहनांची मागणी वाढेल. भारतात लिथियम-आयन बॅटरीच्या किमतीही कमी झाल्या आहेत. अदानी ग्रुप आणि टाटा सारख्या मोठ्या कंपन्या आता भारतात लिथियम-आयन बॅटरीचे मोठ्या प्रमाणात उत्पादन करणार असल्याचेही यावेळी गडकरी यांनी नमूद केले.
