नाशिक शहरात पुन्हा एकदा नवविवाहितेच्या गूढ आत्महत्येने खळबळ माजली आहे. वैष्णवी हागवणे प्रकरणानंतर आणखी एका मुलीने विष प्राशन करून जीवन संपवले असून या घटनेमागचे थरकाप उडवणारे सत्य आता हळूहळू बाहेर येऊ लागले आहे. पंचवटीतील हिरावाडी परिसरात राहणाऱ्या नेहा संतोष पवार हिच्या मृत्यूनंतर सापडलेली सात पानांची सुसाईड नोट आता या संपूर्ण प्रकरणाचे केंद्रबिंदू बनली आहे. नेहाने मृत्यूपूर्वी लिहिलेली ही चिठ्ठी तिच्या भावाला व्हॉट्सॲपवर पाठवण्यात आली होती. “सासरचे लोक चिठ्ठी गायब करतील” या भीतीने घेतलेली ही सावधगिरीच आता तपासाचा सर्वात महत्त्वाचा पुरावा बनली आहे.
पोलिसांच्या मते, नेहाच्या मृत्यूच्या मागे आर्थिक दबाव, कौटुंबिक छळ आणि मानसिक पिळवणुकीची एक सलग साखळी असल्याची शक्यता व्यक्त केली जात आहे. सध्या पंचवटी पोलिसांनी अकस्मात मृत्यूची नोंद घेतली असून शवविच्छेदन अहवालानंतर गुन्हा अधिक गंभीर रूप धारण करू शकतो. सुसाईड नोटमध्ये नेहाने आपल्या लग्नाच्या सुरुवातीपासून तिला कसा त्रास दिला गेला याचे धक्कादायक वर्णन केले आहे. माहेरकडून 15 लाख खर्च करून भव्य लग्न केले, सोन्याचे दागिने हुंड्याच्या नावाखाली द्यावे लागले, आणि तरीही सासरच्या मंडळींची पैशांची मागणी थांबली नाही. त्यांच्या इच्छेनुसार 20 हजार रुपये आणि माहेरची गाडी आणावी लागली, असा उल्लेख तिने चिठ्ठीत केला आहे. मात्र खरी भीतीदायक बाब म्हणजे नवऱ्याच्या वागणुकीवर केलेले आरोप. नेहाने लिहिले की लग्नापूर्वी नवऱ्याचे दुसऱ्या मुलीसोबत प्रेमसंबंध होते आणि तो संबंध आजही तिच्या विवाहित आयुष्यावर सावलीसारखा पसरलेला होता.
नवरा तिला त्या मुलीचे अश्लील फोटो दाखवत असे, तिच्यावर शंका घेत असे आणि सतत तिच्या चरित्रावर प्रश्नचिन्ह उभे करत असे. एवढेच नव्हे तर पाळीबाबत संशय घेऊन सासू आणि नणंदेसह घरातील मंडळींकडून झालेली अवमानकारक तपासणीही तिने नमूद केली आहे. या सगळ्यांच्या पलीकडे, घरातील रोजचा मानसिक आणि शारीरिक छळ नेहाचा जीव घेणारा ठरला असावा, अशी प्राथमिक माहिती समोर येत आहे. मारहाण, शिवीगाळ, कामांचा प्रचंड ताण, आजारी असतानाही विश्रांती न देणे यामुळे तिची अवस्था दिवसेंदिवस बिकट होत गेली.
चिठ्ठीत तिने लिहिलेल्या शेवटच्या काही ओळी वाचून कोणाचेही मन हेलावून जाईल. “मी रोज थोडं थोडं मरत होते… त्यापेक्षा एकदाच सगळं संपवते,” असे तिचे शब्द अंगावर काटा आणणारे आहेत. पोलिसांनी चिठ्ठीची डिजिटल प्रत जप्त केली असून मोबाईल, कॉल रेकॉर्ड्स, आर्थिक व्यवहार आणि कौटुंबिक साक्षीदारांच्या जबाबांवरून या प्रकरणात अनेक नवे धागेदोरे हाती येण्याची शक्यता आहे. तपासाची दिशाच बदलू शकणारे काही महत्वाचे पुरावे हातात येतील का, हा आता मोठा प्रश्न आहे. या घटनेने नाशिकमध्ये पुन्हा एकदा कौटुंबिक छळ आणि हुंडाबळीचा काळा चेहरा समोर आणला आहे. नेहाच्या मृत्यूमागचे खरे कारण नेमके कोणते वळण घेते, याकडे संपूर्ण शहराचे लक्ष लागले आहे.
