पालघर : बाप लेकी नात खूप निर्मळ आणि निखळ असतं. बापासाठी लेक आपल्या काळजात तुकडा असते. परंतु अशाच बाप लेकीच्या नात्याला काळीमा फासणारी घटना समोर आली आहे. मुंबईजवळील नालासोपाऱ्यात घडलेली ही घटना आहे. एका बापाने आपल्या तीन मुलींचा लैंगिक छळ केला आहे. याप्रकरणी नालासोपारा पोलीस ठाण्यात तक्रार दाखल करण्यात आली आहे. पुण्यातील स्वारगेट बसस्थानकातील 26 वर्षीय तरुणीवरील बलात्काराची घटना ताजी असतानाच नालासोपारातील धक्कादायक घटना समोर आली आहे.
नालासोपाऱ्यात घडलेल्या घटनेतील आरोपी सध्या फरार असून पोलिस त्याचा शोध घेत आहेत. 56 वर्षीय नराधम वडील एक कुख्यात गुन्हेगार असून खंडणी, गोळीबार आणि खून यासारख्या गंभीर गुन्ह्यांचा आरोपी आहे. बुधवारी 26 फेब्रुवारीला नालासोपारा पोलिसांनी पीडित मुलींचे जबाब नोंदवून बापाविरूद्ध गुन्हा दाखल केला आहे.
हेही वाचा : Pune Bus Rape Case: पुणे बलात्कार प्रकरणातील आरोपीला पकडण्यासाठी पोलिसांची अजब युक्ती
वडिलाकडून पाच मुलींचा लैगिंक छळ
मुळचे कोकणातील असलेले हे कुटुंब वडिलांच्या सततच्या जाचाला कंटाळून मुंबईत नातेवाईकाच्या आश्रयाला आले. आरोपी नराधमला एकूण 5 मुली असून गावी असताना तो या मुलींवर बळजबरी करुन त्यांचे लैंगिक शोषण करायचा. यापैकी एका मुलीचा चार वेळा गर्भपात देखील करण्यात आला. अखेर वडिलाच्या छळाला कंटाळून आई पाचही मुलींना घेऊन नालासोपारा येथे एका नातेवाईकाच्या आश्रयाला आली.
मोठी मुलगी 21 वर्षांची असून तिच्या इतर बहिणी तिच्यापेक्षा लहान आहेत. वडिलांच्या सततच्या छळाला कंटाळून मुलींनी अखेर पोलिसांत तक्रार करण्याचा निर्णय घेतला. त्यानुसार बुधवारी त्यांनी नराधम वडिलाविरोधात नालासोपारा पोलिसांत तक्रार दाखल केली. या तक्रारीवरुन पोलिसांनी गुन्हा नोंदवून आरोपीविरोधात बलात्कार आणि पोक्सो अंतर्गत गुन्हा दाखल केला आहे. आरोपी सध्या फरार असून पोलिस त्याचा शोध घेत आहेत. बाप लेकीच्या पवित्र नात्याला काळीमा फासणाऱ्या घटनेमुळे नागरिकांमध्ये संताप पसरला आहे.
हेही वाचा : अनंत अंबानींच्या वंताराला मिळाला प्राणी मित्र पुरस्कार
दरम्यान, पुणे स्वारगेट बस स्थानकात 26 वर्षीय महिलेवर अत्याचार करणाऱ्या आरोपी दत्तात्रय गाडे याला शोधण्यासाठी पोलिसांच्या 13 टीम युद्धपातळीवर प्रयत्न करत आहे. प्रशासनाने आरोपीस फरार घोषित करुन त्याला शोधणाऱ्यास 1 लाख रुपयांचे बक्षीस जाहीर केले आहे.
बलात्कार प्रकरणाच्या घटनेवर विरोधी पक्षांच्या नेत्यांनी राज्य सरकारवर तीव्र प्रतिक्रिया व्यक्त केल्या. पुणे क्षेत्रातील वाढत्या गुन्हेगारीला आळा घालण्यात गृहखात्याला अपयश आल्याचा आरोप त्यांनी केला. स्वारगेट हे महाराष्ट्र राज्य मार्ग परिवहन महामंडळाच्या सर्वात मोठ्या बस जंक्शनपैकी एक आहे.
