नागपूर शहरातील धंतोली परिसरातून एकाच कुटुंबातील पाच सदस्य अचानक बेपत्ता झाल्याची धक्कादायक घटना समोर आली आहे. गेल्या अनेक दिवसांपासून या कुटुंबाचा कोणताही संपर्क होत नसल्याने नातेवाईकांसह पोलिसांची चिंता वाढली आहे. या प्रकरणाचा सर्व बाजूंनी तपास सुरू असून मोबाईलच्या तांत्रिक तपासातून एक महत्त्वाचा धागा पोलिसांच्या हाती लागला आहे.
धंतोली येथील बलराज मार्गावरील 'दुर्गा सदन'मध्ये राहणारे हर्षा परसवानी, जितेंद्र परसवानी, ईशिता परसवानी, खुशी परसवानी आणि कृष्णा परसवानी हे 24 जून रोजी सायंकाळी घराबाहेर पडले. त्यानंतर ते पुन्हा घरी परतले नाहीत. त्यांनी कुठे जात असल्याची माहितीही कोणालाच दिली नव्हती. त्यामुळे काही काळ शोध घेतल्यानंतरही त्यांचा ठावठिकाणा न लागल्याने नातेवाईकांनी पोलिसांकडे धाव घेतली.
29 जून रोजी धंतोली पोलीस ठाण्यात या पाच जणांच्या बेपत्ता झाल्याची तक्रार दाखल करण्यात आली. त्यानंतर पोलिसांनी तातडीने तपास सुरू केला. परिसरातील सीसीटीव्ही फुटेज, तांत्रिक माहिती आणि मोबाईल लोकेशनच्या आधारे तपास करण्यात येत आहे.
प्राथमिक चौकशीत कुटुंबातील एका सदस्यावर मोठ्या प्रमाणात कर्ज असल्याची माहिती समोर आली आहे. त्यामुळे कर्जदारांच्या तगाद्यामुळे कुटुंबाने स्वतःहून घर सोडले असावे का, या शक्यतेचाही पोलिसांकडून तपास केला जात आहे. मात्र, या संदर्भात अद्याप कोणताही अधिकृत निष्कर्ष समोर आलेला नाही.
तपासादरम्यान बेपत्ता सदस्यांच्या मोबाईलचे शेवटचे लोकेशन पुणे येथे आढळल्याची माहिती मिळाली आहे. त्यामुळे तपासाची दिशा आता पुण्याकडे वळली असून संबंधित ठिकाणीही माहिती गोळा करण्याचे काम सुरू आहे.
या घटनेमुळे परसवानी कुटुंबातील नातेवाईक मोठ्या चिंतेत आहेत. अनेक दिवस उलटूनही कुटुंबातील कोणाचाही फोन लागत नसल्याने आणि कोणताही संदेश न मिळाल्याने त्यांची काळजी वाढली आहे.
अतिरिक्त पोलीस आयुक्त विनिता साहू यांनी या प्रकरणाचा सर्वंकष तपास सुरू असल्याचे सांगितले आहे. तांत्रिक तपास, विविध जिल्ह्यांतील पोलिसांशी समन्वय आणि इतर उपलब्ध पुराव्यांच्या आधारे बेपत्ता कुटुंबाचा शोध घेण्याचे प्रयत्न सुरू आहेत. लवकरच या प्रकरणाचा उलगडा होईल, असा विश्वास पोलिसांनी व्यक्त केला आहे.
दरम्यान, या रहस्यमय बेपत्ता प्रकरणामुळे नागपूर शहरात खळबळ उडाली असून, या कुटुंबाचा नेमका ठावठिकाणा कधी लागणार, याकडे सर्वांचे लक्ष लागले आहे.
